Францияда депутатлар энди бўйинбоғ ва костюмларсиз юради

Фото: AFP

Франция Миллий йиғилиши депутатлари парламентдаги эшитувлар давомида бўйинбоғ ва костюм кийиб юришга мажбур эмаслар, дейилади қуйи палата бюроси томонидан пайшанба куни тарқатилган хабарда.

Миллий йиғилишнинг олий коллегия идораси томонидан эркакларнинг бўйинбоғ ва кастюм кийиб юриши ҳақидаги масала чоршанба куни кўриб чиқилди. Бунга сабаб – “Бўйин эгмаган Франция” фракцияси депутатларининг хатти-ҳаракатини ўрганиб чиқиш бўлди, улар июнь охирида Миллий йиғилишнинг янги таркиби биринчи мажлисига бўйинбоғ ва костюмларсиз келган. Қуйи палатанинг янги аъзолари ҳаракати қатор сиёсатчилар танқидига сабаб бўлди.

Президентликка собиқ номзод Жан-Люк Меланшоннинг “Бўйин эгмаган Франция” партияси июнь ойидаги сайловлар натижаларига кўра, парламентга биринчи марта кирди.

"Бюро ҳеч бир низом ҳужжатлари депутатларнинг кийимига тегишли эмаслиги ва бўйинбоғ ҳамда костюмларни йиғилиш залида кийишга мажбурият юкламаслигини эслатади", - дейилган ҳисоботда.