Хитой етакчиси дунёни «совуқ уруш» тушунчасидан воз кечишга чақирди

ХХР раиси Си Цзиньпин ХКПнинг 19-съездида қилган чиқишида дунё мамлакатлари халқларига мурожаат қилди. У инсониятни «совуқ уруш» фикридан воз кечишга чақирди. Си Цзиньпин баёноти ҳақида Синьхуа агентлиги хабар қилмоқда. 

«Биз барча мамлакатлар халқларини умумий саъй-ҳаракатлар билан инсониятнинг ягона тақдирига эга ҳамжамиятни барпо этишни чақирамиз… Биз бир-биримизни ҳурмат қилишимиз, тенг ҳуқуқли маслаҳатлашувлар ўтказишимиз, қатъият билан «совуқ уруш» фикри ва куч ишлатиш сиёсатидан воз кечишимиз керак», — деган ХХР раиси. 

Унинг сўзларига кўра, халқаро муносабатларда янгича ёндашувларни қўллаш зарур, улар «зиддиятлашув ва блоклар қарашидан эмас, мулоқот ва ҳамкорлик нуқтаи назаридан келиб чиқиши керак».