Корея Ўзбекистон билан ўзаро муносабатларни 3 асосий стратегик йўналиш бўйича ривожлантиради

Бугун, 23 ноябрь куни Сеул шаҳрида Шавкат Мирзиёев ўзининг Жанубий Кореяга давлат ташрифи доирасида Корея – Ўзбекистон бизнес форумида иштирок этди.

Форумда икки давлатнинг иқтисодий ва молиявий тузилмалари раҳбарлари, етакчи ишбилармонлари қатнашишди.

Президент Мирзиёев сўзга чиқиб бўлганидан сўнг сўз навбатини Корея Республикаси бош вазири ўринбосари, стратегия ва молия вазири Ким Донг-ён олди. У Ўзбекистон президентининг нутқини катта ҳаяжон ва қизиқиш билан тинглаганини таъкидлади. У ҳали иш амалиётида ўз мамлакати ривожланиши ва бизнесни қўллаб-қувватлаш учун шунчалик катта эътибор қаратган давлат раҳбарини учратмаганини айтиб ўтди. Жаноб Ким Донг-ён шунингдек, хорижий давлат раҳбарини аэропортда кутиб олиш учун корейс протоколи тарихида илк бор бош вазирнинг ўринбосари даражасидаги амалдор юборилгани, бу ҳам Корея раҳбарияти ва халқи томонидан Ўзбекистонга ҳурмат ва қизиқиш юқори эканлигидан дарак беришини айтиб ўтди.

Шундан сўнг Корея Республикаси савдо, саноат ва энергетика вазири Бэк Ун-гю чиқиш қилди. У корейс томони Ўзбекистон билан ўзаро муносабатларни уч асосий стратегик йўналиш бўйича ривожлантириши мумкинлигини қайд этди: биринчиси — юқори қўшилган қийматли маҳсулотларни ишлаб чиқаришни кенгайтириш; иккинчиси — нодир металларни қазиб олиш ва газ-кимё соҳасидаги бизнесни ривожлантириш; учинчиси — тикланувчи энергия соҳасида бизнесни ривожлантириш. У шунингдек, таълим соҳасида ўзаро ҳамкорликни кенгайтириш аҳамияти ҳақида гапирди. Жаноб Бэк Корея Навоийдаги логистика марказини минтақада ўз соҳасидаги етакчилар қаторига чиқаришга интилишини таъкидлаб ўтди.

Форум қатнашчиларига Корея Республикаси парламенти аъзоси, жаноб Сонг Юнг-гил ҳам мурожаат қилди. Унинг қайд этишича, ўзбек халқининг мислсиз меҳмондўстлиги ва кенг қалби туфайли ўтган асрнинг мураккаб йилларида йирик корейс диаспораси ўзбек заминида қўним топгани ва сўнгра ўзбек жамиятига сингиб кетганини қайд этиб ўтди. У шунингдек, Ўзбекистон Республикаси президенти Ш.Мирзиёев бизнес форумда чиқиш қилиб, давлат раҳбари хорижий тадбиркорлар ва инвесторлар билан қандай мулоқот қуриши кераклиги борасида чинакам мастер-класс ўтиб берганини таъкидлади.