Хитой компанияси Ўзбекистон қишлоқ хўжалигига 500 миллион долларлик сармоя киритади

Хитойнинг энг йирик компанияларидан бири Ўзбекистон қишлоқ хўжалиги соҳасига ярим миллиард долларлик инвестиция киритиш бўйича битим имзолади. 

5–12 декабрь кунлари Хитойнинг Хенан провинциясидаги Wanbang компаниясининг раҳбарияти Ўзбекистоннинг ХХРдаги элчиси Бахтиёр Саидовнинг тавсияси билан мамлакатимизга ташриф буюрди.

Wanbang компанияси Женгжоу шаҳрида 40 000 кв.м майдонга жойлашган, улгуржи савдога мўлжалланган энг йирик озиқ-овқат логистика марказини барпо этган. Ушбу логистика марказида 6500 корхона фаолият юритади. Марказда 150 мингдан ортиқ киши турли маҳсулотлар билан савдо қилиб, улар учун турли қулайликлар ҳамда логистика маркази ёнида кўп қаватли апартаментлар барпо этилган. Компания 50дан ортиқ мамлакат билан ҳамкорлик қилиб келади.

Хитой озиқ-овқат бозорининг 37 фоизини эгаллаган ушбу компания вакиллари Тошкент, Самарқанд, Жиззах, Сирдарё вилоятларида бўлиб, Ўзбекистон билан ҳамкорлик ришталарини ривожлантиришга катта қизиқиш билдирди. Ўзбекистон ва ХХР ҳамкорлигининг кординатор вакили «Озиқ-овқат холдинг»нинг Хитой йуналиши бўйича бўлим бошлиғи Дилшод Муллабаевнинг таклифи ва компания раҳбариятининг хайрихоҳлиги билан қишлоқ хўжалиги, жумладан, чорвачилик маҳсулотларини етиштириш, кўпайтириш, қайта ишлаш ва қадоқлаш бўйича ҳамда тайёр маҳсулотларни экспорт, импорт ва реэкспорт қилиш каби йўналишларда 15дан ортиқ лойиҳани амалга ошириш бўйича келишувга имзо чекилди.

Ушбу лойиҳаларни молиялаштириш учун жами 500 миллион долларлик инвестициялар жалб қилинади. Ушбу келишув Henan Wanbang Selected Supply Chain Management Co.Ltd, Ўзбекистон Республикаси Қишлоқ ва сув хўжалиги вазирлиги ва «Озиқ-овқат холдинг» ўртасида имзоланди.

Имзоланган келишувга кўра, Ўзбекистоннинг эркин иқтисодий зоналарида 10 000 гектарлик худудга логистика марказлари, қишлоқ хўжалик маҳсулотларини қайта ишлаш объектларини барпо этиш кўзда тутилган. Бундан ташқари, Ўзбекистонда етиштирилган 100 минг тонна мошни Хитойга экспорт қилиш режаси ҳам бор. Музокараларда Ўзбекистон қишлоқ ва сув хўжалиги вазири ўринбосари Отабек Мустафоев, «Озиқ-овқат холдинг» раиси Тоҳиржон Жалилов, Ўзбекистон ва ХХР ҳамкорлигидаги кординатор вакили, холдингнинг Хитой йўналиши бўйича бўлим бошлиғи Дилшод Муллабаев ва Хитойнинг Henan Wanbang Selected Supply Chain Management Co.Ltd компаниясининг бош менежери Чэнь Гуанхун иштирок этишди.