Хитойнинг электрокарлар ишлаб чиқаришга ихтисослашган Nio стартапи ўзининг илк маҳсулоти — ES8 кроссовери савдосини бошлади. Бу ҳақда Bloomberg агентлиги ёзмоқда.
Компаниянинг уқдиришича, машина 4,4 сонияда тезлигини соатига 100 км.га етказа олади. Унинг энг юқори тезлиги 180 км/с.ни ташкил этади. Бироқ электрокар қисқа муддатли спорт тартибида 200 км/с тезликка ҳам эриша олади.
ES8 бир марта тўлиқ қувватлангач 500 км масофани ортда қолдира олади. Автомобиль 8 соатда тўлиқ қувватланади.
Кроссовер конструкцияси батареяларни қувватлаш станцияларида 3 дақиқада алмаштириш имконини беради. Бундан ташқари ES8 Power Mobile фирмасининг хизмат кўрсатиш автомобиллари ёрдамида ҳам қувватлана олади.
Nio 2020 йилга келиб Хитойда 1100 дан ортиқ қувватлаш станциясини барпо этишни ҳамда 1200 дан ортиқ Power Mobile хизмат автомобилларини керакли ускуналар билан жиҳозлашни режалаштирмоқда.
ES8 нархи 448 минг юань (67,8 минг доллар) экани айтилмоқда. Бунда Tesla Model X Хитой бозорида 836 минг юань (126,5 минг доллар) туради.
Nio 2017 йил ноябрида 1 млрд доллардан ортиқ сармояни жалб қила олди. Компания баҳоси 5 млрд долларга етди. Ишлаб чиқарувчи олинган маблағлар ҳисобидан бизнесини глобал миқёсга олиб чиқишни режалаштирмоқда.
Стартап 2020 йили Америка бозорига Nio Eve муқобил электромобилни етказиб беради.
