Швецияда электромобилларни зарядловчи йўл қурилди (видео)

Швецияда қурилган электромобилларни зарядловчи йўл узунасига 2 километр бўлиб, Стокҳольм ва Стокҳольм-Арланд аэропортини бирлаштирувчи йўл участкасида жойлашган. The Guardian шундай янгилик билан бўлишди.

Инновацион йўл қурилиши учун eRoadArlanda компанияси жавобгар. Электр энергиясини етказиш учун контакт рельслардан фойдаланилган. Автомобилни электрон тармоққа улаш учун автомобилнинг тагига ўрнатиладиган кўчма ток қабул қилгич (токоприёмник)лар қўлланилади. Электромобил келган тақдирда, рельсларга автоматик равишда электр токи узатилади.

Бундай йўлда батареяни қувватлантириш учун тўлов киритишга тўғри келади. Тўлов машина эгасининг зарядкага уланиши давомида сарфланган энергияга қараб олинади.

"Зарядловчи" йўл қурилиши трамвай линияси ўтказишга қараганда 50 баравар арзонроққа тушар экан. Хусусан, бир километр шундай йўл 1 миллион еврони ташкил қилган. Бундай йўлнинг жорий қилиниши ички ёниш двигателларига эга автомобиллардан чиқувчи зарарли моддалар чиқиндиларини сезиларли даражада камайтириш имконини беради. Швеция ҳукумати электр йўллар тармоғини ривожлантиришни 2030 йилгача ички ёниш двигателларига эга автомобиллар сонини қисқартириш режасига киритди.

Тизим қандай ишлайди?

Керакли пайтда дастак пастга тушиб, рельс билан алоқага киришади. Масалан, ҳайдовчи бошқа бир машинадан ўзиб кетишга уринса, дастак кўтарилади.

Рельс транспорт воситаси бевосита юқорида бўлгандагина фаоллашувчи секцияларга ажратилган. Тизим шунингдек машина қачон тўхташини ҳам билади ва токни ўчиради.

Бундай комплексни ўрнатиш ишларини минимал сармоялар билан ҳам амалга ошириш мумкин. Рельслар мавжуд йўлларга интеграция қилиниши мумкин ва ҳеч қандай йирик қурилишга ҳожат қолмайди.

Бундай электрификация ҳар қандай турдаги машинага тўғри келади - енгил машиналардан то юк машиналаригача. Шаҳар жамоатчилик транспорти шунингдек кўчаларни сон-саноқсиз симлардан озод қилиб, ушбу концепцияни қўллаши мумкин.

Бу тизимнинг энг катта муаммоси автомобилга қўшимча ускуналарни ўрнатишдан иборат. Хизмат бепул бўлмас экан, электр энергияси учун ҳисоб келадиган алгоритмни ташкиллаштириш керак.