Зимбабвенинг собиқ президенти Роберт Мугабе 28 май куни олмослар қазиб олишда маблағларнинг ўғирланиши иши бўйича парламент жараёнига иккинчи марта келмади. Бу ҳақда мамлакат парламентининг кон ва энергетика ишлари бўйича қўмитаси раҳбари Тембла Млисвага иқтибос келтирган ҳолда Zwnews портали маълум қилди.
Аввалроқ маълум қилинганидек, собиқ президент мамлакатдаги энг катта олмос кони Марангени ўзлаштиришда коррупцияга йўл қўйилган бўлиши мумкинлиги юзасидан парламентнинг кон саноати қўмитаси аъзолари саволларига жавоб бериши керак эди. Мугабенинг ўзи президентлиги вақтида олмослар сотилишидан давлатга 15 млрд доллар келиб тушмаганини тан олган.
“Биз унга агар келмаса, бўйсунмасликда айбланишини эслатиб ўтамиз”, деб айтган Млисва.
Портал маълумотларига кўра, кейинги жараён 11 июнга белгиланган.
2017 йил ноябрида 93 ёшли Мугабе ҳарбийлар ва ҳукмрон партия раҳбарияти босими остида истеъфога кетишга мажбур бўлганди.
Маранге кони 2006 йилда очилган бўлиб, мутахассисларнинг баҳолашича, сайёрамиздаги энг катта олмос кони ҳисобланади. Унинг ўзлаштирилишида Хитой, БАА, ЖАР компаниялари иштирок этган. Кон 300 квадрат километрдан кўпроқ майдонни эгаллайди.
