Россиянинг Чита шаҳрида миллий адоват негизида бир қатор қотилликларни содир этган 45 ёшли Евгений Краснояров умрбод озодликдан маҳрум этилди. Бу ҳақда Байкалорти ўлкаси прокуратураси маълум қилди.
Терговнинг аниқлашича, Краснояров 2006 йилдан 2016 йилгача 10 йил давомида 8 та қотиллик ва 7 та суиқасдни амалга оширган. Қурбонлар асосан ўзбекистонлик ва тожикистонлик мигрантлар бўлган.
Қотил 2006 йилда Чита-Хабаровск ва Чита-Забайкальск йўллари кесишмаси яқинида мевалар сотаётган икки кишини тўппончадан отиб ўлдирган. 2012 йилда у Молотов коктейли ёрдамида циганлар оиласи яшаган уйга ўт қўйган ҳамда уйнинг эгаси ва унинг 11 ёшли қизини тўппончадан отиб ўлдирган.
Краснояров 2013 йил майида катта шов-шувга сабаб бўлган қотилликни амалга оширган. У Песчанка посёлкасида 4 кишини – 2 нафар ўзбекистонлик эркак ва улар билан бирга бўлган 2 рус аёлини ўлдирган.
У кейинги ҳужумларини 2013 ва 2014 йилларда содир этган. Қотил тўппончадан мева сотувчиларни яралаган. Жабрдийдалар Тожикистон фуқаролари бўлган. Улардан бири кейинроқ шифохонада вафот этган.
Краснояров ўшанда ўзини “яхши иш қилмоқдаман”, деб ҳисоблаган. У хорижлик сотувчиларни ўлдириб, шаҳарни “гиёҳвандфурушлардан тозалаяпман”, деб ўйлаган. Бироқ қурбонларнинг гиёҳвандфурушликка алоқадорликлари бўйича унинг тахминлари ўз исботини топмаган.
Қотил миллий адоват негизидаги қотилликлар билан чегараланиб қолмаган ва шахсий хусумат негизида бир нечта қотиллик содир этган.
Маҳаллий ОАВ қотил 1990-йилларда бир нечта жиноий тўда аъзоси бўлгани ҳақида маълумот берган.
Суд қотилга умрбод қамоқ жазосидан ташқари, 50 минг рубл миқдорида жарима солган ва жабрланувчиларга 4,5 млн рубллик маънавий зиённи тўлаб бериш мажбуриятини қўйган.
