Генуядаги тиргаксиз қолган кўприкнинг қолган қисми уйлар устига қулаши мумкин. Бу ҳақда воқеа жойида ишлаётган шаҳар ёнғин хизмати вакили айтди.
«Кўприкнинг қолган қисми ҳеч нарса билан маҳкамланмаган ва уйлар устида осилиб турибди. У ердан барча аҳоли эвакуация қилинган, аммо кўприк қулаши хавфи сақланиб турибди», — деди у.
РИА Новости агентлигининг хабар беришича, воқеа жойига яқин ҳудуддан 600дан ортиқ киши эвакуация қилинган.
Эслатиб ўтамиз, 14 август куни Генуядаги кўприкнинг 200 метрга яқин бўлган қисми қулаб тушди. Натижада 30дан ортиқ машина кўприк бўлаклари остида қолди. Айни пайтда 39 киши ҳалок бўлгани маълум бўлган.
Польчевера Виадуки номи билан танилган бу кўприк саноат ҳудуди, темирйўл ва дарё устидан ўтган. Унинг умумий узунлиги 1102 метрга тенг. Кўприк 1960-йилларда қурилган бўлиб, 2016 йилда реконструкция қилинган.
