18 сентябрь куни соат 08:30 атрофида Бухоро вилояти Когон тумани ҳудудидан ўтувчи Бухоро-Қоровулбозор магистрал йўлида ҳаракатланган йўловчи автобусида нохуш ҳодиса рўй берди.
Фавқулодда вазиятлар вазирлиги «Kun.uz»га маълум қилишича, автобусдаги газ баллони портлаши натижасида 4 йўловчи воқеа жойида, 1 киши эса шифохонада вафот этган.
Автобусда жами 26 киши бўлган.
Соғлиқни сақлаш вазирлиги маълумотига кўра, айни вақтда аҳволи оғир бўлган 5 нафар бемор Республика шошилинч тиббий ёрдам илмий маркази (РШТЁИМ) Бухоро филиалига ётқизилган. Яна 7 нафар беморнинг аҳволи ўрта оғирликда, 9 нафарининг аҳволи енгил бўлиб, улар Когон шаҳар тиббиёт бирлашмаси шошилинч тез тиббий ёрдам бўлимига ётқизилган.
«Жароҳатланганларга шошилинч ёрдам кўрсатиш учун барча зарурий чоралар кўрилиб, РШТЁИМдан хирург, нейрохирург ва реаниматолог мутахассислари санавиация тармоғи орқали юборилган», дейилади хабарда.
Ҳозирда жабрланганларнинг шахси тўғрисидаги маълумотлар аниқланмоқда.
Автоҳалокат сабабларини ўрганиш бўйича ҳукумат комиссияси тузилган.
