АҚШ ҳукумати ишни қисман тўхтатди. Трамп бунга изоҳ берди

АҚШда федерал ҳукумат 22 декабрь, шанба куни ишини қисман тўхтатиб қўяди. Бу ҳақда The Washington Post ёзмоқда.

Хабар қилинишича, Америка сенати ва вакиллар палатаси ходимлари бюджет муҳокамасини тугатиб, қарор қабул қилмасдан Капитолийни тарк этишган.

Аниқлик киритилишича, мамлакатнинг энг муҳим вазирликларини молиялаштириш Тошкент вақти билан соат 10:00да тўхтатилади.

Қўшма Штатлар президенти Дональд Трамп мамлакат ҳукумати иши тўхтатилишига муносабат билдирди. Бу сиёсатчи ҳақида твиттердаги ўз саҳифасида ёзган.

Унинг сўзларига кўра, ҳукумат фаолияти тўхтатилиши билан ҳеч нарса қилишнинг имкони йўқ. Унинг умид билдиришича, бу ҳолат узоқ давом этмайди.

«Бизнинг буюк мамлакатимиз хавфсиз чегарага эга бўлиши керак», - дея маълум қилди Трамп.

Эслатиб ўтамиз, аввалроқ АҚШ Конгресси «Трамп девори»га олти миллиард доллар сарфлашга қарор қилгани хабар берилганди.