«Олтин бутса» пойгаси амалда тугади – Мессидан навбатдаги рекорд

Барселона» етакчиси Лионель Месси кетма-кет учинчи мавсумда «Олтин бутса» соврини соҳибига айланиши деярли маълум бўлиб улгурди.

Леонинг мазкур мукофот учун рақобатдаги энг яқин таъқибчиси Килиан Мбаппе жума куни Франция чемпионатининг сўнгги тур ўйинида битта гол билан кифояланди. Унинг 59-дақиқадаги голи жамоаси учун ягона бўлиб қолди – «ПСЖ» «Реймс» майдонида 1:3 ҳисобида енгилди.

Қайд этиш керак, Мбаппе Франция кубоги финалидаги интизомсизлиги учун учта ўйинга четлатилган, шу боис биринчи дивизионнинг бундан олдинги учта ўйинида қатнаша олмаган эди.

Килиан 29 ўйинда урган 33та голи билан Франция чемпионати тўпурари бўлди, Месси эса аввалроқ Ла Лигани 34та учрашувдаги 36та гол билан якунлаган эди.

1968 йилда таъсис этилган ушбу мукофотни, шунингдек, португалиялик Криштиану Роналду («МЮ», «Реал») 4 маротаба қўлга киритган. Яна 9 футболчида 2тадан «Олтин бутса» бор.