27 июль куни Кореянинг Кванжу шаҳридаги тунги клублардан бирида бино қисмининг қулаб тушиши оқибатида ҳалок бўлган ва жароҳатланганлар рўйхатида Ўзбекистон фуқаролари, жумладан сув спорти турлари бўйича жаҳон чемпионатида иштирок этаётган юртимиз спорт делегацияси аъзоларининг номлари йўқ. Бу ҳақда мамлакатимизнинг Сеул шаҳридаги элчихонасининг консуллик бўлими берган маълумотга асосланиб Ўзбекистон ТИВ хабар қилди.
Хабарда қайд этилишича, шаҳар полицияси ҳам ушбу маълумотни тасдиқлади.
Аввалроқ тўққиз нафар спортчи - тўрт америкалик, икки янги зеландиялик, бир нафар голландиялик, италиялик ва бразилиялик ҳамда жаҳон чемпионатига алоқадор бўлмаган икки нафар Ўзбекистон фуқароси жабрлангани хабар қилинганди.
Жанубий Корея ҳуқуқни муҳофаза қилиш органлари хабарига кўра, мазкур ҳодиса оқибатида 2 киши ҳалок бўлган, 17 киши, жумладан жаҳон чемпионатининг 9 нафар хорижлик иштирокчилари жароҳат олган.
Консуллик-ҳуқуқий департаменти Корея Республикаси ҳудудида бўлиб турган Ўзбекистон фуқароларига улар зарурат туғилган ҳолатларда Сеул шаҳридаги элчихонага қуйидаги телефон рақамлари орқали мурожаат қилишлари мумкинлигини эслатиб ўтади: +82-02-574-65-54, +82-02-577-36-60.
