Яна фирибгарлик ва яна ХБА: Кореяга кетиш учун пул берган андижонликлар алданди
|19:45 / 25.02.202024 9548 мин
Раҳбари устидан жиноий иш очилган навбатдаги хусусий бандлик агентлиги – “Historical Travel”. Агентлик раҳбари ўнлаб фуқароларни Кореяга ишга жўнатишни ваъда қилиб, фирибгарлик йўли билан 2500-5000 доллардан пул йиғиб олганликда айбланяпти.
Kun.uz таҳририятига хусусий бандлик агентлиги устидан навбатдаги шикоят Андижон вилоятидан келиб тушди.
«Андижон шаҳрида жойлашган «Xususiy Bandlik Agentligi Historical Travel» МЧЖ раҳбари Элёр Омонов чет давлатга ишга юбораман деб, ҳар биримиздан 2500 АҚШ долларидан 5000 АҚШ долларигача пул олди ва 1 йилдан ортиқ вақт мобайнида бизни чет элга жўната олмади. Натижа бўлмагач, пулларимизни қайтариб бермаяпти», – дейилади алданиб қолган фуқаролар мурожаатида.
Мурожаатчилар билан боғланиб, улар билан Андижон шаҳрида учрашдик.
«2018 йил декабрь ойида «Xususiy Bandlik Agentligi Historical Travel» МЧЖга келиб, раҳбари Элёр Омоновга Корея давлатига ишга кетиш учун ҳужжат топширдим.
МЧЖ иш фаолияти рекламасини телевизорда ва интернет орқали кўрган эдим. Мен декабрь ойида шартнома туздим ва ҳужжатларни қабул қилишлари учун 2500 АҚШ доллари миқдорида пул тўладим.
Агарда 6 ой ичида чет элга чиқара олишмаса, берган пулларимни 100 фоиз қайтаришларини айтишган эди.
Март ойига бориб, ички имтиҳон бўлишини ва шу ойда чиқиб кетишимизни ҳам таъкидлашди. Имтиҳонлардан ҳам ўтдик. Орадан 6 ой ўтгач, МЧЖ раҳбари бизни аслида E9 визаси билан Кореяга юбориши кераклигини, лекин бу виза ҳозир йўқлиги сабабли E7 виза билан жўнатишини ва яна кутиб туришимизни айтди.
Мана, ҳозиргача кутяпмиз. Берган пулларимизни ундира олмаяпмиз. Уларни ундириш мақсадида Андижон шаҳар ИИБ Тергов бўлимига мурожаат қилдим. Улар менга тергов жараёнлари кетаётганини айтишди. Шундан бери 2 ҳафта ўтди. Ҳеч қандай натижа бўлгани йўқ», – дейди Азизбек Эргашев.
«Мен ҳам танишларим ва интернет орқали эшитиб, Кореяда ишлаб келиш учун 2019 йил январь ойида пул топширгани келдим. Бозор нархида 5000 АҚШ долларини МЧЖ раҳбарининг қўлига топширдим. Орадан 1 йил-у 2 ой ўтди. Кореяга жўнатиш ҳақида ҳеч қандай янгилик бўлмади. «Ана виза чиқади, мана чиқади», деб алдаб келишди.
«Бу корхона рекламасини кўргач, Кореяга ишга бориш учун шу фирмага ҳужжат ва пул топширгани келдим. Олдиндан 50 фоиз тўлаш кераклигини айтишди. Мен тезроқ жўнатишнинг иложи борми, деб сўрагандим, МЧЖ раҳбари бунинг учун 100 фоиз тўловни амалга оширсангиз, 3 ой ичида Кореяга чиқарамиз деб ваъда берди.
Тезда қариндошларимдан пул йиғиб, олиб келдим. Ўзимга бера қолинг деган эди, мен банкка тўлашимни айтдим. Тўлаган пулим корхона ҳисоб рақамига тушгани ҳақидаги квитанциясини олиб келиб кўрсатдим.
3 ой ичида чиқиб кетишим керак эди. МЧЖ раҳбари эса қўшимча ҳужжатлар сўрай бошлади. Корейс тили курсида ўқиганлик тўғрисида сертификат, диплом ва иш стажига оид ҳужжатларни сўради. Барчасини тақдим этдик. Кейин қўшимча пуллар сўрай бошлади. Биз тўлиқ тўлаганимизни айтганимизда, ҳозирда корхонанинг имкониятлари чатоқлигини, пул кераклигини ва берадиган пулларимизни албатта қайтаришини айтди.
Орада ўша гап, E9 виза бўлмаслигини, E7 виза қилишини ҳам таъкидлади. Бу виза эса 7000-7500 АҚШ долларига тушишини айтганида, имкониятимиз йўқлигини билдирдик. Қолган қисмини Кореяга боргач, ишлаб узишимиз мумкинлигини айтди. Яқин орада кетишимизни маълум қилди. Яна қўшимча ички имтиҳон топширдик. Имтиҳондан кимдир ўтди, кимдир ўта олмади. Лекин ўтганлар ҳам, ўтмаганлар ҳам кета олишмади.
Шундан кейин мен шаҳар прокуратурасига мурожаат қилдим. Корхона раҳбари Элёр Омонов устидан ИИБда тергов ишлари олиб борилаётганини айтишди. Терговчи билан учрашиб, ариза ёздим. Орадан 1 ой ўтгач, терговчи билан боғланганимда, у менга суд бўлишини, ҳаммаси ўшанда ҳал этилишини айтди.
Ундан кейин корхонага келдик. Ҳужжатларимизни қайтариб беришини сўраганимизда, корхона раҳбарининг онаси уларнинг устидан шикоят қилганимиз учун бизга пулларни қайтариб бермаслигини билдирди. Аёл киши бўлгани учун тортишмадик. Кейинчалик корхона ўз фаолиятини тўхтатганини эшитдик», – дейди Бобиржон Мамажонов.
«Бу пулларни қарзга олгандим...»
«Мен ҳам шулар қатори, фарзандимнинг чет элда ишлаши учун «Xususiy Bandlik Agentligi Historical Travel» корхонасига пул топширганман. Шу пайтгача қайтариб ололмадим. Бу пулларни қарзга олган эдим. Ҳозир уйимда ҳаловат йўқ», – дейди Муқаддасхон Мамадалиева.
Мурожаатчиларнинг аксарият қисми ҳеч қандай юридик ҳужжатлар расмийлаштирмай, МЧЖ раҳбари ёки корхонанинг бошқа бир мутасадди ходимига тилхат асосида тўловни амалга оширган.
Кимдир бу тўловни амалга ошириш учун яхши ниятлар билан тўплаган жамғармасини, кимдир яқинларидан қарзга олинган пулни ёки ўзининг автомашинасини сотишидан тушган маблағни сарфлаганини айтиб ўтди.
Улар билан биргаликда Андижон шаҳар, Миллий тикланиш кўчаси 13-уйда жойлашган «Xususiy Bandlik Agentligi Historical Travel» МЧЖ офисига бордик. Бино пештоқида ҳозир ҳам МЧЖнинг реклама баннерлари илиниб турибди.
Вилоят Ички ишлар бошқармасидан олинган маълумотга кўра, Андижон шаҳар ИИБ тергов бўлими томонидан «Xususiy Bandlik Agentligi Historical Travel» МЧЖ фаолияти бўйича тергов ишлари олиб борилмоқда.
Жабрланганлар сони – 31 нафар. Жами аниқланган зарар эса 827 млн сўм.
Хозирги кунга қадар айбланувчилардан 35 млн сўм нақд пул кўринишида ундирилган. Қолган қисми корхонанинг депозит ҳисоб рақамидан жабрланувчиларга хатланган.
Айни пайтда МЧЖ раҳбари Элёр Омоновга нисбатан қамоқ эҳтиёт чораси танланиб, жиноят ишининг унга тегишли қисми белгиланган тартибда судга юборилган.
Жиноят ишининг яна беш нафар шахсга нисбатан қисми алоҳида иш юритувига ажратиб олиниб, хозирда тергов ҳаракатлари давом эттирилмоқда.
Эслатиб ўтамиз, ўтган ҳафта Бош вазир Абдулла Арипов мамлакатдаги барча хусусий бандлик агентликларини тугатиш бўйича президентга таклиф киритилишини айтганди.
Масъул ходимлари устидан жиноят иши очилган ХБАлар сони 2020 йил январь ойи охиригача 5та эди. Февраль ойида яна камида иккита хусусий бандлик агентлиги фаолияти терговга тортилди.
