Тупроққалъа туманини ижтимоий-иқтисодий ривожлантириш бўйича ҳукумат қарори қабул қилинади

Вазирлар Маҳкамасининг “Хоразм вилоятининг Тупроққалъа туманини 2020-2022 йилларда комплекс ижтимоий-иқтисодий ривожлантириш чора-тадбирлари тўғрисида”ги қарори лойиҳаси муҳокама учун жойлаштирилди.

Қуйидагиларни назарда тутувчи Хоразм вилоятининг Тупроққалъа туманини 2020-2022 йилларда комплекс ижтимоий-иқтисодий ривожлантириш чора-тадбирлари дастури тасдиқланади:

2020-2022 йилларда Хоразм вилоятининг Тупроққалъа тумани комплекс ижтимоий-иқтисодий ривожлантириш дастурининг мақсадли параметрлари ва молиялаштириш манбалари;

2020-2022 йилларда Хоразм вилоятининг Тупроққалъа туманида саноат, қишлоқ хўжалиги ва хизмат кўрсатиш соҳаларини ривожлантириш бўйича инвестиция лойиҳаларининг манзилли дастури;

2020-2022 йилларда Хоразм вилоятининг Тупроққалъа туманида йўл-транспорт инфратузилмаси тизимини яхшилаш ва электр энергия, табиий газ, ичимлик сув ҳамда алоқа тармоқларини реконструкция ва модернизация қилиш дастури;

2020-2022 йилларда Хоразм вилоятининг Тупроққалъа туманида ижтимоий инфратузилмани ривожлантириш дастури;

2020-2022 йилларда Хоразм вилоятининг Тупроққалъа туманида ирригация ва мелиорация объектларини таъмирлаш дастури.

Уй-жой коммунал хизмат кўрсатиш вазирлиги, Молия вазирлиги, Хоразм вилояти ҳокимлиги туман аҳолисини узлуксиз тоза ичимлик суви билан таъминлаш мақсадида янгидан “сув тозалаш иншооти” ташкил қилиш ҳамда Питнак шаҳарчасида оқова сув тизимини (канализация) реконструкция қилиш ишларига 2020-2022 йилларда Европа тикланиш ва тараққиёт банкининг маблағларини жалб қилиш чораларини кўради.

Инвестициялар ва ташқи савдо вазирлиги, Иқтисодий тараққиёт ва камбағалликни қисқартириш вазирлиги, Молия вазирлиги “Ҳазорасп” эркин иқтисодий зонаси иштирокчилари томонидан ишлаб чиқариладиган маҳсулотларни нарх жиҳатдан рақобатбардошлигини таъминлаш мақсадида эркин иқтисодий зонаси иштирокчиларига республиканинг бошқа ҳудудларидан олиб келинадиган хом ашёлар ва республика ҳудудларига етказиб бериладиган маҳсулотларни ташиш учун транспорт воситаларига сарфланадиган харажатларга субсидия бериш бўйича Вазирлар Маҳкамасига таклиф киритадилар.

Молия вазирлиги, Давлат солиқ қўмитаси “Ҳазорасп” эркин иқтисодий зонаси иштирокчиларига давлат томонидан эркин иқтисодий зонаси ҳудудида лойиҳа амалга ошириш учун зарурий бино ва иншоотларни қуришда қурувчи ташкилот томонидан кўрсатиладиган хизматлар учун ундириладиган қўшилган қиймат солиғига тенг миқдорда субсидия бериш масаласини кўриб чиқадилар.

“Ҳазорасп” эркин иқтисодий зонасига берилган барча имтиёзлар Тупроққалъа туманининг бутун ҳудудига татбиқ этилади.

Хоразм вилояти ҳокимлиги:

Ер ресурслари, геодезия, картография ва давлат кадастри давлат қўмитаси, Қишлоқ хўжалиги вазирлиги, Фермер, деҳқон хўжаликлари ва томорқа ер эгалари кенгаши, Сув хўжалиги вазирлиги билан биргаликда туман ҳудудида қишлоқ хўжалигига мўлжалланган ер майдонларини тўлиқ хатловдан ўтказиб, фермер ва бошқа қишлоқ хўжалиги корхоналарини Вазирлар Маҳкамасининг 2013 йил 31 январдаги “Фермер хўжалиги ер майдонини мақбуллаштириш ва уни тугатиш тартиби тўғрисидаги Низомни тасдиқлаш ҳақида”ги 22-сонли қарори асосида янгидан ташкил этилишини таъминлайди;

Қишлоқ хўжалиги вазирлиги, Сув хўжалиги вазирлиги билан биргаликда туман ҳудудида қишлоқ хўжалигига мўлжалланган ер майдонларида сув тежовчи технологияларни босқичма-босқич жорий қилинишини таъминлайди;

Қишлоқ хўжалиги вазирлиги билан биргаликда 2020-2022 йилларда 25-30 минг гектар янги ерларни ўзлаштириш, чорвачилик, балиқчилик ва деҳқончиликни ривожлантириш, иссиқхоналар ташкил қилиш учун зарур шарт-шароитларни яратиш бўйича чора-тадбирлар режасини ишлаб чиқиб, тасдиқлаш учун Вазирлар Маҳкамасига киритади.

Давлат мулкини бошқариш агентлиги, Инвестициялар ва ташқи савдо вазирлиги, Давлат солиқ қўмитаси, Ер ресурслари, геодезия, картография ва давлат кадастри давлат қўмитаси, Хоразм вилояти ҳокимлиги билан биргаликда Тупроққалъа туманидаги давлат объектлари, шунингдек бошқа бўш турган ер майдонлари ва бино-иншоотлар ҳолати тўлиқ хатловдан ўтказади.

Хатлов натижаларига кўра, объектлардан самаралари фойдаланиш ёки фойдаланмай турган объектларни қонунчиликка мувофиқ маҳаллий ҳокимлик балансига ўтказиш ёки қайтариб олиш бўйича чора-тадбирлар дастурини ишлаб чиқиб тасдиқлайди.

Мактабгача таълим вазирлиги Хоразм вилояти ҳокимлиги, Савдогарбанк билан биргаликда президентнинг 2020 йил 30 январдаги “Мактабгача таълим соҳасида давлат-хусусий шерикликни янада ривожлантириш чора-тадбирлари тўғрисида”ги ПҚ-4581-сон қарори асосида туманда давлат-хусусий шерикчилик асосида 100 ўринли мактабгача таълим муассасасини 2020 йил сентябрь ойига қадар ишга туширилишини таъминлайди.