Президент ИИВга қишлоқ хўжалиги ва ишлаб чиқариш соҳасидаги транспортлар эркин ҳаракатланишини таъминлаш бўйича топшириқ берди

Ўзбекистонда коронавирус пандемияси туфайли жорий этилган карантин шароитида қишлоқ хўжалиги ва ишлаб чиқариш билан боғлиқ автотранспорт воситаларининг карантин қоидаларига риоя қилган ҳолда эркин ҳаракатланишига рухсат берилмоқда.

Фото: Президент матбуот хизмати

14 апрель куни Ўзбекистон президенти Шавкат Мирзиёев раислигида қишлоқ хўжалиги тармоқларини янада ривожлантириш, озиқ-овқат маҳсулотлари ишлаб чиқариш ҳажмини ошириш масалалари бўйича видеоселектор йиғилиши ўтказилди.

Президент матбуот хизмати хабарига кўра, йиғилишда давлат раҳбари қишлоқ хўжалиги ва ишлаб чиқариш билан боғлиқ автотранспорт воситаларининг эркин ҳаракатланишига рухсат бериш борасида ҳам топшириқ берган.

Унга кўра, эндиликда карантин қоидаларига амал қилган ҳолда, қишлоқ хўжалиги ва ишлаб чиқариш билан боғлиқ автотранспорт воситаларининг эркин ҳаракатланиши таъминланади. Бу ҳақда президент Ички ишлар вазирлигига топшириқ берган.

Март ойи охирида карантин туфайли автотранспорт воситалари ҳаракатига чеклов жорий қилинганди. Истисно тариқасида қишлоқ хўжалиги ва ишлаб чиқариш билан боғлиқ автотранспорт воситаларининг эркин ҳаракатланишига рухсат берилмоқда.

#қишлоқ хўжалиги #Шавкат Мирзиёев