«Давлат идоралари ахборот қонунчилигини ҳурмат қилиши шарт» – Ахборот соҳаси расмийлари Учкўприкдаги воқеага муносабат билдирди

Воқеа 21 апрель куни рўй берган бўлиб, мухбир, ўзининг айтишича, нархлар ва товарлар сифатини ўрганиш учун Учкўприк туманида ташкил этилган арзон озиқ-овқат маҳсулотлари ярмаркасига борганида туман ҳокимлиги ва ИИБ вакиллари томонидан тўсиққа учраган, шундан сўнг ИИБга олиб кетилиб, 2,5 соат ушлаб турилган.

Президент Администрацияси ҳузуридаги Ахборот ва оммавий коммуникациялар агентлиги раҳбари Дилшод Саиджонов бу масалада Бош прокуратурага мурожаат қилинганини айтиб, давлат идораларини қонунчиликни ҳурмат қилишга чақирган.

«Кеча Агентлигимизга «Маърифат» газетаси журналисти Шарифа Мадраҳимовадан Фарғона вилояти Учкўприк тумани ҳокимлиги томонидан ҳуқуқлари бузилганлиги тўғрисида мурожаат келиб тушди.

АОКА воқеликни диққат билан ўрганиб чиқди ва якунда туман ҳокимлик вакиллари ҳамда туман ИИБ ходимлари томонидан «Оммавий ахборот воситалари тўғрисида» ва «Журналистларнинг касбий фаолиятини ҳимоя қилиш тўғрисида»ги қонунлар ҳамда Ўзбекистон Республикаси Жиноят кодекси нормалари бузилиши эҳтимоли юзасидан вазиятга ҳуқуқий баҳо беришни сўраб, Бош прокуратурага мурожаат қилди.

Ҳозирги вақтда Бош прокуратура масалани ўрганмоқда ва натижалари бўйича ўз қарорини билдиришни режалаштирмоқда.

Президент Ш.Мирзиёевнинг очиқлик сиёсати давлат идораларидан халқ билан яқин мулоқот ўрнатиш, фуқароларнинг сўровлари, муаммолари ва таклифларига ўз вақтида жавоб беришни талаб қилади. Ушбу мулоқотни олиб боришда оммавий ахборот воситалари ва блогерлар беқиёс рол ўйнайди, улар халқимизга ахборот етказишда барча давлат ҳокимияти ва бошқаруви органларига катта ёрдам кўрсатмоқда. Улар, шунингдек, давлат идоралари матбуот хизматининг таянчи ҳисобланади.

Aгентлик барча давлат идоралари ахборот соҳасида мамлакат қонунчилигини ҳурмат қилишлари ва конструктив танқидни тўғри қабул қилишлари шарт деб ҳисоблайди, чунки ОAВ ва блогерлар идораларнинг обрўси ва ҳаракатларига путур етказиш мақсадида танқид қилишмайди, балки шу орқали уларга фуқароларнинг маълум муаммоларини кўришларига имкон бериш учун, давлат органлари фаолиятидаги, хусусан жамиятни хабардор қилишдаги хатолар, камчиликлар ва уларни халқимиз манфаатларига мос равишда тезда бартараф этиш учун меҳнат қилишади», – дейилади АОКА раҳбари Дилшод Саиджоновнинг муносабатида.

Миллий масс-медиани қўллаб-қувватлаш ва ривожлантириш жамоат фонди ҳам ўз баёнотида ҳуқуқ идораларига мурожаат йўлланганини билдириб, ахборот олиш ва тарқатиш Конституцияда белгилаб қўйилган ҳуқуқ эканини барча масъулларга эслатиб ўтган.

«21 апрель куни Фарғона вилоятининг Учкўприк туманида яшовчи журналист, «Маърифат» газетасининг вилоятдаги махсус мухбири Шарифахон Мадраҳимовага Учкўприк туман ҳокимлиги ва туман ИИБ ходимлари томонидан босим ўтказилгани ҳақида хабарлар тарқалди. Фонд ушбу масала бўйича ҳолатни қонун доирасида батафсил ўрганиб чиқишни ҳамда журналистга нисбатан босим ўтказиш ҳолати аниқланган тақдирда мутасаддиларга тегишли тартибда чора кўрилишини сўраб, Ўзбекистон Республикаси Бош прокуратураси ва Ички ишлар вазирлигига мурожаат йўллади.

Шуни алоҳида таъкидламоқчимизки, Масс-медиа фонди Ўзбекистон Республикаси Президенти Шавкат Мирзиёев бошчилигида матбуот ва сўз эркинлигини таъминлаш йўлида амалга оширилаётган ислоҳотларни қўллаб-қувватлайди ҳамда барча бўғинлардаги мутасаддиларни журналист ва блогерларнинг Ўзбекистон Республикаси Конституциясида белгилаб қўйилган ахборот олиш ва тарқатиш ҳуқуқини ҳурмат қилишга чақириб қолади», – дейилади фонд баёнотида.

Эслатиб ўтамиз, журналист Шарифахон Мадраҳимова Kun.uz билан суҳбатда маълум қилгандики, Учкўприк ҳокимлиги ташкил этган ярмаркада 500 сўмлик тухумни харид қилмоқчи бўлганида сотувчи бир кишига кўпи билан 5 дона сотилишини айтган.

«42 минг сўмдан бўлган гўшт ўта сифатсиз бўлиб, сарғайиб уч-тўрт кун турди, биров олмади. Чиришга келган картошканинг килоси 2500 сўм бўлиб, фойдаланишга ярайдиган эмас эди», – дейди Мадраҳимова.

Унинг сўзларига кўра, ярмаркадаги ҳолатни тасвирга олаётганида ўзини «туман ҳокимлиги вакили» деб таништирган шахс ундан телефонини тортиб олган ва ИИБ ходимини чақирган. Ички ишлар ходими эса уни шахсини аниқлаш учун ИИБга бориш кераклигини айтган.

Мухбирнинг айтишича, ИИБдагилар «газетада ишловчи ходимнинг видеотасвирга олишга ҳаққи йўқ»лиги, мухбир ярмаркани съёмка қилаётганидан «ҳоким бехабар»лигини айтган; журналистни қўйиб юбориш учун ҳокимнинг телефон қилишини кутишган.

Учкўприк тумани ҳокими Акмалжон Маҳмудалиев Kun.uz билан суҳбатда воқеа бўйича брифинг ташкил этилишини билдирди. «Барчасига ўша брифингда батафсил ойдинлик киритилади», дея ваъда қилган туман раҳбари тадбирга ИИБ ходимлари ҳам чақирилишини қўшимча қилди.

Kun.uz Бош прокуратурадан олган маълумотга кўра, ҳолатни Фарғона вилоят прокуратураси текширмоқда.