ФВВ Оқдарё туманидаги буюм бозорида рўй берган ёнғин юзасидан муносабат билдирди

14 ноябр куни Kun.uz сайтида «Оқдарё буюм бозоридаги ёнғин: дўкондорлар ўт ўчирувчилар кеч келганидан норози ва ёрдамга муҳтож» сарлавҳаси остида репортаж берилган эди.

Унда Самарқанд вилояти Оқдарё тумани марказидаги кийим-кечак бозорида содир бўлган ёнғин оқибатида 10дан зиёд дўконлар ёниб кетгани ҳикоя қилинган, воқеа гувоҳлари ва дўкондорларга микрофон тутилган эди.

Фавқулодда вазиятлар вазирлиги ушбу репортаж юзасидан расмий муносабат билдирди.

«Маълумки, инсон фавқулодда вазиятга тушиб қолганида, вақт секин ўтгандек, воқеа эса жуда узоқ содир бўлгандек туюлади. Ҳақиқатда фавқулодда ҳодисалар, жумладан, ёнғинлар ҳам қисқа вақт ичида ривожланиб, авж олади. Одатда фавқулодда ҳодисалар инсон руҳиятига кучли таъсир кўрсатиб, мулк эгалари ушбу вазиятларда тегишли хизматларга боғланишдан кўра, офатни мустақил равишда бартараф этишга ҳаракат қилади. Бу эса аксарият ҳолатларда офатнинг кенгайишига сабаб бўлади.

Берилган маълумотда 2020 йил 12 ноябр куни Лойиш шаҳарчаси Амир Темур кўчасидаги «Оқдарё савдо комплекси»да содир бўлган ёнғинни ўчиришга жалб этилган куч ва воситаларнинг ҳаракатларидан ёнғиндан зарар кўрган дўкон эгаларининг норозилиги тўғрисида маълум қилинган.

Маълумотда қайд этилган ҳолат бўйича қуйидагиларни таъкидлаш лозим:

12 ноябр куни соат 18:42да Оқдарё тумани ФВБ диспетчерлик хизматига туманнинг «Оқдарё савдо комплекси»да ёнғин рўй берганлиги тўғрисида комплекс қоровули фуқаро Ш.Исломов томонидан хабар берилади ва 2 та ёнғин-қутқарув экипажи ёнғин жойига соат 18:49да етиб борган.

Шунингдек, ёнғинни ўчиришга Самарқанд шаҳридан қўшимча равишда 2 та, Иштихон туманидан 1 та ёнғин-қутқарув экипажлари жалб этилиб, ёнғин соат 19:00 да ўраб олинган, соат 20:10да эса тўлиқ ўчирилган.

Маълумот учун: 9-касбийлаштирилган ёнғин-қутқарув қисмидан ёнғин рўй берган объектгача масофа 3,5 километрни ташкил этади.

Ёнғинни бартараф этишга қаратилган тезкор тадбирлар тўлиқ олиб борилган бўлсада, савдо комплексидаги жами 10 та (56-, 57-, 58-, 59-, 60-, 61-, 27-, 28-, 29-, 31-) савдо дўконининг жами 180 кв.м майдони зарар кўрган.

Мутахассисларнинг фикрига кўра, савдо комплекси 2017 йилдан буён фаолият кўрсатаётган бўлиб, ёнғин хавфсизлиги қоидаларига умуман риоя қилинмагани бўйича бозор маъмуриятига мунтазам равишда тақдимнома ва тавсияномалар киритилган.

2020 йилнинг июн ва октябр ойларида мутахассислар томонидан ўтказилган профилактик кўриклар давомида савдо комплексида ёнғин хавфсизлиги соҳасидаги меъёр ва қоидаларнинг бузилиши билан боғлиқ ҳолатларни бартараф этиш бўйича қайд этилган камчиликлар масъуллар томонидан бартараф этилмагани ҳам ёнғин келиб чиқишига сабаб бўлиб, ёнғинни бартараф этишга салбий таъсир кўрсатган.

Бундан ташқари, ёнғиннинг катта майдонга қисқа муддатда тарқалиши, савдо дўконларида кўп миқдорда тез алангаланувчи моддий бойликларнинг тартибсиз жойлаштирилгани, дўконларнинг бир-бирига зич қилиб қурилгани, бозор ҳудудида сув манбалари мавжуд эмаслиги, ўз навбатида ёнғинни тезкор бартараф этишда қийинчиликларни келтириб чиқарган», – дейилади вазирлик ахборотида.

Таъкидланишича, куз-қиш мавсумида юзага келиши мумкин бўлган фавқулодда вазиятлар ҳамда бахтсиз ҳодисаларнинг олдини олиш, содир бўлганда оқибатларини камайтириш муҳим аҳамиятга эга.

Инсон ҳаёти, унинг соғлиғини муҳофаза қилиш, моддий бойликларни асраб-авайлаш мақсадида Фавқулодда вазиятлар вазирлиги ушбуларни тавсия этган:

• Объектларда фавқулодда вазиятлар содир бўлганда тўғри ҳаракатланиш учун эвакуация йўллари доимий равишда очиқ бўлишини таъминлаш;
• Бино ва иншоотлар ёнғин хавфсизлигини таъминлаш учун бирламчи ёнғин ўчириш воситалари билан жиҳозланган бўлиши;
• Барча бино ва иншоотларда мавжуд бўлган электр сим ва кабеллари, электр манбаларидан фойдаланиш қоидалари асосида ўтказилиши;
• Бино ичида носоз ва қўлбола электр ва иситиш мосламаларидан ҳамда носоз газ асбобларидан фойдаланмаслик ва ушбу жиҳозларни назоратсиз қолдирмаслик;
• Электр таъминотида вақтинчалик ўтказилган электр симларидан ва ясама сақлагичлардан фойдаланишни қатъий тақиқлаш;
• Фавқулодда вазиятлар вазирлиги масъул ходимлари томонидан бериладиган тавсия ва кўрсатмалар ижросини тўлиқ таъминлаш.