Адлия вазирининг “Норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказиш тартиби тўғрисидаги низомни тасдиқлаш ҳақида”ги буйруғи лойиҳаси эълон қилинди.
“Коррупцияга қарши курашиш тўғрисида”ги қонуннинг 19-моддасига мувофиқ норматив-ҳуқуқий ҳужжатлар ва улар лойиҳаларининг коррупцияга қарши экспертизасини ташкил этиш давлат бошқаруви соҳасида коррупциянинг олдини олишга доир чора-тадбирлардан бири ҳисобланади.
Маълум қилинишича, ўрганишлар давлат органлари ва ташкилотларида норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказиш тизими етарли даражада йўлга қўйилмаганини кўрсатмоқда.
Шунга кўра, коррупцияга қарши экспертиза ўтказишнинг амалдаги тартибини такомиллаштириш зарурияти мавжудлиги айтилади.
Лойиҳа билан қуйидагиларни назарда тутувчи Норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказиш тартиби тўғрисидаги низомни тасдиқлаш кўзда тутилмоқда:
норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказиш тартиби ва схемаси;
норматив-ҳуқуқий ҳужжатлар ва улар лойиҳаларида коррупциявий омилларни аниқлаш методикаси;
коррупциявий омилларни аниқлаш бўйича чеклист.
Шу билан бирга, “Норматив-ҳуқуқий ҳужжатлар ва уларнинг лойиҳаларини коррупцияга қарши экспертизасини ўтказиш услубиётини тасдиқлаш тўғрисида”ги буйруқ ва унга киритилган ўзгартириш ва қўшимчалар ўз кучини йўқотган деб топилмоқда.
