Икки ой ичида 378 454 нафар йўловчи Ўзбекистон чегарасини кесиб ўтди, уларнинг 173 нафарида коронавирус инфекциясига мусбат натижа аниқланган. Бу ҳақда Санитария-эпидемиологик осойишталик ва жамоат саломатлиги хизмати бошлиғи ўринбосари Ботир Қурбонов маълум қилди.
67 studio «Телеграм» каналида хабар берилишича, Ўзбекистонга кириб келаётган фуқаролардан COVID-19’га экспресс-тест олиш билан боғлиқ муаммолар ва уларнинг эътирозларига сабаб бўлаётган масалалар ечимларига бағишланган матбуот анжумани бўлиб ўтди.
Ботир Қурбоновнинг матбуот анжуманида айтишича, 2020 йилнинг 25 декабридан то бугунги кунгача халқаро аэропортлар орқали 708та самолёт, темир йўллар орқали 8та поезд ва автомобил йўллари орқали 70 340та автотранспорт республика ҳудудига кириб келди.
«Ушбу кириб келган транспортлар ёрдам 378 454 нафар йўловчи тиббий санитария кўригидан ўтказилган, улардан 131 874 нафари чет эл фуқароларидир. Кириб келган йўловчи ва ҳайдовчилардан коронавирус инфекциясига намуна олинган бўлиб, улардан 173 нафарида экспресс усулида мусбат натижа аниқланган. Жумладан, авиайўловчилар орасида 72 нафарда, автомобил йўллари орқали келган йўловчи ва халқаро юк ташувчилар орасида 101 нафарида мусбат натижа аниқланган», деди Ботир Қурбонов.
Аввалроқ, чегарада экспресс тест текширувларини ташкил этувчи компаниялар учун танлов эълон қилингани хабар берилганди.
