Тахтиқорача довонининг Самарқанд вилояти Ургут туманида жойлашган қисмида «Газель» юк машинаси жарликка тушиб кетган. Бу ҳақда вилоят ИИБ ЙҲХБ хабар бермоқда.
Маълум қилинишича, 2021 йил 2 июнь куни соат 10:00ларда М-39 Алмати-Тошкент-Термиз халқаро автомобиль йўлининг Ургут тумани Омонқўтон маҳалласи ҳудудидан ўтувчи 1031-километрида ҳаракатланиб келаётган «Газель» юк машинасининг радиатор суви қайнаб, тик баландликда тўхтаган.
Ҳайдовчи машинани қўл тормозига қўйиб, сувга тушган вақтда, у ҳаракатланиб, жарликка тушиб кетган.
Қайд этилишича, ҳодиса натижасида ҳеч ким жароҳат олмаган. Фақат машина жиддий шикастланган. Ҳолат юзасидан Ургут тумани ИИО ФМБ ЙҲХБ ходимлари томонидан суриштирув ишлари олиб борилмоқда.
