Президент Шавкат Мирзиёев “Транспорт ва молия соҳаларидаги айрим ҳуқуқбузарликларни содир этганлик учун маъмурий жазолар либераллаштирилиши муносабати билан Ўзбекистон Республикасининг Маъмурий жавобгарлик тўғрисидаги кодексига ўзгартиш ва қўшимчалар киритиш ҳақида”ги қонунни имзолади.
Қонунга кўра, амалиётда баҳсли мавзуга айланган масала ўз ечимини топди. Яъни эндиликда транспорт воситалари ҳайдовчиларининг белгиланган ҳаракат тезлигини ошириб юборганда тезликни ўлчайдиган махсус ускуналар қайд этган тезликдан соатига 5 километр айириб ташлаб ҳисоблаш тартиби жорий этилмоқда. Шу вақтгача амалиётда фақат биринчи ўлчовдагина 5 км/соат айириб ташланиб, иккинчи ва учинчи ўлчовларда бу тартиб қўлланмаётган эди.
Шунингдек, киритилган ўзгартиришларга кўра, ҳайдовчилар транспортни бошқаришда телефондан қулоқчинлар орқали ва қўлларини ишлатмасдан гаплашиш имконини берадиган ускуналар орқали фойдаланиши мумкин.
Бундан олдинроқ Kun.uz’да тезликни оширганда рухсат этилган +5 км/соат нега фақат биринчи ўлчовда қўлланаётгани ҳақида мақола эълон қилинганди.
