Самарқанд вилояти Булунғур туманида фуқарони туман тиббиёт бирлашмасига ишга киритиб қўйишини айтиб пора олган тиббиёт ходимлари ушланган. Бу ҳақда туман ҳокимлиги ахборот хизмати хабар бермоқда.
Самарқанд вилояти ҳуқуқ-тартибот идоралари ходимлари томонидан тиббиёт соҳасида порахўрлик жиноятига чек қўйиш мақсадида тезкор тадбир ўтказилган.
Тадбирда Булунғур туман тиббиёт бирлашмаси ходимлари А.Ш., А.Д. ва А.И. ўзаро жиноий тил бириктириб, фуқарони туман тиббиёт бирлашмасига ишга қабул қилиш масаласини ижобий ҳал қилиб беришни ваъда бериб, ундан 1 300 АҚШ доллари олаётган вақтда ашёвий далиллар билан қўлга олинган.
Қайд этилишича, ҳозирда тиббиёт бирлашмаси ходимларига нисбатан Жиноят кодексининг тегишли моддалари билан жиноят иши қўзғатилди ва тергов ҳаракатлари олиб борилмоқда.
