Пойтахт судларининг 9 нафар судяси жавобгарликка тортилди

Судялар олий кенгаши матбуот котиби Турсунали Акбаровнинг Kun.uz’га маълум қилишича, 2022 йилнинг ўтган даврида 4 нафар судянинг ваколати муддатидан илгари тугатилган. Уларнинг 3 нафари ўз аризасига кўра, бир нафари – жиноят ишлари бўйича Ангор туман судининг раиси Камолиддин Хидиров судялик қасамёдини бузгани сабабли лавозимидан озод этилган.

Бундан ташқари 2022 йилнинг 4 феврал куни:

• жиноят ишлари бўйича Яккасарой туман судининг судяси – Х.Парпиев;
• фуқаролик ишлари бўйича Миробод туманлараро судининг судяси – А.Менглиев;
• Тошкент туманлараро иқтисодий судининг судялари – И.Ражабов, Н. Ҳамидов, О.Гулямова, О.Исмоилов;
• жиноят ишлари бўйича Чилонзор туман судининг раиси – И.Сабиров;
• жиноят ишлари бўйича Олмазор туман судининг раиси – З.Бобонов;
• жиноят ишлари бўйича Олмазор туман судининг судяси – Ж.Нажимов масъулиятсизлиги ва йўл қўйган хато-камчиликлари учун интизомий жавобгарликка тортилган.

Эслатиб ўтамиз, жиноят ишлари бўйича Ангор туман судининг раиси Камолиддин Хидиров одил судловни амалга оширишда қонунийликни бузгани, суд ишини ташкил этишда бепарволиги ва интизомсизлиги оқибатида йўл қўйган камчиликлари учун шу йилнинг январ ойида Кенгаш томонидан лавозимидан озод этилганди.

Аввалроқ, Судялар олий кенгаши 2022 йилдан бошлаб тизимда очиқлик ва шаффофликни таъминлаш орқали судяларнинг масъулиятини янада ошириш мақсадида интизомий жавобгарликка тортилган судялар ҳақида мунтазам очиқ ахборот бериб борилишини маълум қилганди.