Навоий кўчасини Ортиқхўжаевга алоқадор компания таъмирлаётган бўлиши мумкин

14 феврал куни пойтахтнинг Алишер Навоий шоҳкўчасида таъмирлаш ишлари бошланди. Таъмирлаш ҳақида аввалроқ маълумот берилмагани сабаб, одамлар аввалига нима бўлаётганини тушуна олмади. Кейинроқ маълум бўлишича, шаҳар ҳокимлиги Навоий кўчасини бошидан охиригача буткул реконструкция қилишни бошлаб юборган.

Жамоатчилик муҳокамасидан ўтказилмаган реконструкция лойиҳаси эътирозларга сабаб бўлди. Чунки лойиҳада илмий хулосалар ва президент топшириқларига зид равишда устуворлик пиёдаларга эмас, яна автомобилларга берилган.

Аввалроқ пойтахтга трамвайлар қайтиши эълон қилингани инобатга олинса, у қайси кўчалардан ўтишини аниқ белгиламай туриб реконструкция бошлаш яна беҳуда пул сарфлашга сабаб бўлиши мумкин.

Йўлни ким қурмоқда?

Тошкент шаҳар ҳокимлиги матбуот хизмати Kun.uz сўровига жавобан Навоий кўчасини реконструкция қилиш қайси компанияга топширилгани ҳамда лойиҳага қанча маблағ йўналтирилгани ҳақида айни дамда матбуот хизматида маълумот йўқлигини маълум қилди.

Kun.uz манбасининг сўзларига кўра, йўлларни қайта реконструкция қилиш ишлари Тошкент шаҳар ҳокимлиги қошидаги «Ягона буюртмачи хизмати» ИК буюртмасига мувофиқ Grand Road Tashkent МЧЖга топширилган.

Юридик шахслар реестрига кўра, мазкур компания йўллар ва шосселар қуриш билан шуғулланади. Grand Road Tashkent'нинг 62,1 фоиз улуши Grandway in компаниясига тегишли (Grandway İnşaat Yatırım Anonim Şirketi – турк компанияси). Корхонанинг 37,9 фоиз улушига эса Тошкент шаҳар ҳокимлиги муниципиал маркази активларни бошқариш маркази эгалик қилади.

«Тошкентдаги кўплаб йўллар таъмирини асосан шу компания амалга оширган. Буюртмачи эса шаҳар ҳокимлигининг ягона инжиниринг компанияси», – дейди манба.

2018 йилда ташкил этилган компания cўнгги бир йил ичида Тошкентдаги кўплаб йўллар қурилиши ва реконструкция ишларини амалга оширган. Хусусан, Сергели туманида Қумариқ кўчаси реконструкцияси, Сергели туманидаги 6 қаторли йўл қурилиши, Аҳмад Дониш кўчаси бўйлаб Нурафшон кўчасигача бўлган йўлнинг капитал таъмири, Чўпонота, КХАЙ, ТҲАЙ ва Қипчоқ кўчалари ўртасида олти қаторли йўл ва 3та йўл ўтказгич қуриш, Фарғона йўли кўчаси реконструкцияси (2021 йил март ойида якунланган) кабилар шулар жумласидан.

Ҳозирча компания расмий саҳифасида муҳокамаларга сабаб бўлаётган йўл қурилишини бошлагани ҳақида маълумот йўқ. Kun.uz компания офиси билан боғланиб, бу борада аниқ жавоб ололмади.

Жаҳонгир Ортиқхўжаев ва яна манфаатлар тўқнашуви эҳтимоли

Orginfo.uz сайтидан кўринишича, Grand Road Tashkent – пойтахт ҳокими Жаҳонгир Ортиқхўжаевнинг J-United Group компаниясига тегишли савдо белгиси ҳисобланади.

Grand Road Tashkent'нинг Facebook'даги саҳифасида 2021 йил 9 июн куни қолдирилган постда, 5та компания – Grand Road Tashkent, Durable Beton, Allergo Developed Project, City Net ва Constant Chemicals – Durable Group ҳолдинг таркибига кириши маълум қилинган.

Очиқ маълумотларга кўра, Durable Group савдо белгиси ҳам Жаҳонгир Ортиқхўжаев эгалик қиладиган J-United Group МЧЖга қарашли. Ўтган йили шаҳарда давлат буюртмалари асосида қилинган кўплаб таъмирлаш ишларида Durable Beton ишлаб чиқарган брусчаткалардан фойдаланилган, айрим ҳолатларда ҳатто таъмирга ҳожат бўлмаган жойларда ҳам эски брусчаткалар устига янгилари териб кетилган эди.

Ҳокимга алоқадор компаниялар ҳоким бошқараётган давлат идораси бўйсунувидаги корхонадан кўплаб буюртмалар олаётгани давомли равишда манфаатлар тўқнашувига йўл қўйиб келинаётганини кўрсатиши мумкин.

Айни пайтда, Grand Road Tashkent ва Durable Beton компаниялари қўлга киритган ўнлаб давлат буюртмаларининг қиймати қанчалиги ҳақида маълумот йўқ.

Шуниси маълумки, Тошкент шаҳар ҳокимига алоқадор бошқа бир фирма – Eco House-Group тиббиёт соҳасига оид камида 403 млрд сўмлик лойиҳаларни тендерсиз олган. Kun.uz бу ҳақда берган хабарида «Давлат харидлари тўғрисида»ги қонунга биноан 6,8 млрд сўмдан ошиқ лойиҳаларни тендерсиз бериш тақиқланганига эътибор қаратганди.

Бугун, 16 феврал куни Тошкент шаҳар ҳокимлиги Навоий кўчасидаги реконструкция ишлари юзасидан матбуот анжумани зтказади. Унда журналистларни унча хушламайдиган шаҳар ҳокими Жаҳонгир Ортиқхўжаев иштирок этса, қатор саволларга  ойдинлик киритилса ажаб эмас.