Вазир ўринбосари ички ишлар ходимларини видеога олиб тарқатиш жавобгарликка сабаб бўлишини айтди. Ғиёсов изоҳ берди

“Ички ишлар идоралари ходимларига қаршилик кўрсатиш ёки уларни видеотасвирга олиб интернет тармоқларида тарқатиш масаласида куни кеча президентимиз ички ишлар ходимларининг ижтимоий ҳимоясини такомиллаштириш бўйича 118-сонли қарорни имзоладилар. Ушбу қарорда айнан хизмат вазифасини бажариш жараёнидаги ходимларни видеотасвирга олгандан сўнг унинг рухсатисиз ижтимоий тармоқларга чиқаришга нисбатан ҳам маъмурий жавобгарлик белгиланади”, деб айтган Бекмурод Абдуллаев UzNews.uz нашрига берган интервьюсида.

Вазир ўринбосари тилга олган 118-сонли президент қарорини Ўзбекистон Республикаси Қонунчилик маълумотлари миллий базаси (Lex.uz сайти) ва норматив-ҳуқуқий ҳужжатлар эълон қилиб бориладиган бошқа платформаларда ҳужжатлардан топишнинг имкони бўлмади.

Kun.uz вазир ўринбосарининг муҳокамаларга сабаб бўлаётган сўзлари юзасидан вазирлик ахборот хизмати раҳбаридан изоҳ олди.

“Ходимларни видеога олиб, ижтимоий тармоқларга тарқатганлик учун ҳали маъмурий жавобгарлик белгилангани йўқ. Давлат раҳбари томонидан имзоланган 118-сонли қарорда шу ҳақда вазифа юклатилган.

Президент селекторида ҳам ушбу масала кўтарилганди. Давлат раҳбари қонунчиликка ўзгартириш киритиш бўйича вазиримизга топшириқ берганлар. Ушбу таклиф ишлаб чиқилгач, лойиҳа шаклида жамоатчилик муҳокамасига қўйилади, ҳамма бу борада ўзининг фикрини билдириши мумкин бўлади. Шунда ҳам тўлиқ тақиқ бўлмайди, лекин қандайдир чегаралар қўйилади”, дея Шоҳрух Ғиёсовнинг сўзларини келтирмоқда Kun.uz мухбири.

11 февраль куни бўлиб ўтган видеоселектор йиғилишида президент Шавкат Мирзиёев йўл ҳаракати хавфсизлиги инспекторлари фаолиятига қаршилик кўрсатиш муаммосига эътибор қаратиб, бунинг учун жавобгарликни кучайтириш кераклигини айтганди.

“Эркинликни суиистеъмол қиладиганлар кўпайиб кетди. Айниқса, автоблогерлар мисолида айтадиган бўлсам, ходимларни обрўсизлантиришни одатга айлантириб олишди. Бизга етиб келган маълумотларга кўра, улар ЙҲХХ ходимлари билан жанжал, тортишув акс этган видеоларни юборганларга 100 минг сўмдан беш юз минг сўмгача тўлашмоқда. Мақсад аниқ – “просмотр”лар сонини кўпайтириш.

Буни ҳеч қанақасига жамоатчилик назорати деб бўлмайди. Бу тўғридан тўғри хизмат фаолиятига тўсқинлик қилиш, ички ишлар тизимини обрўсизлантириш ҳисобланади. Гарчи,қонун ҳамда ваколатларидан четга чиқмай ишлаётган бўлса-да, видеолари монтаж қилинган ҳолда тарқаб кетаётгани ЙҲХХ ходимларининг кайфиятига, ишчанлигига таъсир қилаётганини кўриб-билиб турибмиз”, дейди у.

Эслатиб ўтиш керакки, Ички ишлар вазири матбуот котиби Шоҳрух Ғиёсов 2020 йилнинг 15 декабрь куни АОКАда бўлиб ўтган матбуот анжуманида ички ишлар ходимлари ишига халақит бермаган ҳолда тасвирга олиш ва хоҳлаган платформага видеони қўйиш мумкинлигини таъкидлаганди.

“Биз ички ишлар органлари — давлат хизматчисимиз. Давлат хизматчисини хоҳлаган одам, хоҳлаган вақтда тасвирга олиши мумкин ва хоҳлаган платформага ушбу видеони қўйиши мумкин. Бу ҳеч қаерда тақиқланмаган. Лекин битта нарса мумкин эмас ва илтимос қилинади: ходимларнинг ишига халақит бериш керак эмас. Ички ишлар органлари ходимлари, пост-патрул ва йўл-патрул хизмати ходимлари ишига халақит бермаган ҳолда хоҳлаган жойингизда ва хоҳлаганча тасвирга олишингиз мумкин”, – деб айтганди ўшанда Шоҳрух Ғиёсов.

Ички ишлар вазирининг матбуот котиби айни пайтда давлат хизматчиларини, жумладан, ички ишлар ходимларини видеога олиш қонунан тақиқланмагани, давлат раҳбарининг топшириғига биноан қонунчиликка киритиладиган ўзгаришларда бу борада кузатилаётган муаммолар тартибга солинишини айтади.

“Ўша пайтда айтган сўзларим ҳозир ҳам кучида. Айни пайтдаги қонунчиликка кўра, жамоатчилик назорати инструменти сифатида давлат хизматчиларини бемалол тасвирга олиб, тарқатиш мумкин. Бугунги кунда бу борада ҳеч қандай муаммо йўқ. Ҳозир ҳам бу меъёр ўз кучида.

Вазир ўринбосари ходимларни видеога олиб тарқатганлик учун маъмурий жавобгарлик белгиланиши мумкинлигини айтганда “уларнинг рухсатисиз” деб айтган эди. Интернетга тарқатиш учун ходимнинг рухсати талаб этилади. Масалан, биз журналист ва блогерларга бир нарсани эълон қилишдан олдин биздан изоҳ олишини, қайсидир ҳолатни нотўғри талқин қилиш орқали асоссиз маълумот тарқатган бўлиб қолишлари мумкинлигини, бунинг учун эса жавобгарлик борлигини доим айтиб келамиз.

Фуқаролар ички ишлар ходимлари билан қандайдир низоли вазият юзага келганида ёхуд улар хизмат ваколатидан ташқарига чиққанида, ўзлари учун жараённи видеотасвирга олишлари мумкин. Ҳали бу жараён энди бошланди, бу бўйича ҳужжат ишлаб чиқилгани йўқ. Ишлаб чиқилгач, у муҳокамага қўйилади. Шунда ҳам бутунлай тақиқлаш йўлидан борилмайди. Аммо соҳадаги мавжуд муаммолардан келиб чиқиб ходимларни видеога олиш ва тарқатиш жараёни қонун билан тартибга солинади”, дея таъкидлайди Шоҳрух Ғиёсов.

Эслатиб ўтамиз, 2021 йил 29 ноябрдаги 27-сонли президент фармони билан тасдиқланган Ўзбекистон Республикаси жамоат хавфсизлиги концепциясида оммавий ахборот воситалари ва интернет орқали жамоат хавфсизлигини таъминлаш бўйича ваколатли давлат органлари ходимларини обрўсизлантириш ҳолатларининг олдини олиш ва уларга барҳам беришнинг ташкилий-ҳуқуқий асосларини такомиллаштириш кўзда тутилган.