Яқин уч йил ичида Қашқадарёда 90 гектар боғ ва 87 гектар яшил жамоат парклари пайдо бўлади

Вилоятда 2021-2022 йиллар куз-баҳор ойларида жами 16 млн 356 минг дона кўчат экиш режалаштирилган. 2021 йилнинг кузида, “Долзарб 40 кунлик” доирасида 7,3 млн дона кўчат экилган бўлса, 2022 йил баҳор ойларида 6 млн 772 минг дона дарахт ва бута кўчатлари экилди.

Қарши шаҳар ҳокимлиги томонидан 200 минг дона мевали ва манзарали кўчатлар ҳамда 1 миллионга яқин терак ва тол новдалари олиб келиниб, маҳаллаларга бепул етказиб берилди. 

Бундан ташқари, “Янги Ўзбекистон” боғлари, 37,8 гектар яшил боғлар ва 22 гектар яшил жамоат парклари, бир турдаги дарахт кўчатлари экилган 15 та намунавий кўча ташкил этиш кўзда тутилган.

“Яшил макон” умуммиллий лойиҳаси доирасида баҳор мавсумида дарахт ва буталар, тол ва теракларни экиш ишларини самарали ташкил этиш мақсадида жорий йилнинг 25 мартидан 5 майгача “Долзарб 40 кунлик” эълон қилинди.

Терак новдаларини маҳаллаларга экишдан ташқари, жорий йилнинг баҳор ва куз мавсумида 625 км умумий фойдаланишдаги автомобиль йўллари ёқаларига 25 млн дона терак қаламчалари экилди.

Экилган ҳар бир терак кўчати ва қаламчаларининг парвариш қилиниши тизимли назорат қилиб борилади. Жумладан, автомобиль йўли бўйларида жойлашган фермер (деҳқон) хўжаликлари ҳамда жисмоний шахсларга терак кўчати ва қаламчалар экилган майдонлар (1 ёки 2 км дан вақтинча фойдаланишга) 2 300 дан ортиқ жисмоний шахсларга ҳамда 400 дан кўпроқ фермер (деҳқон) хўжаликларига берилади.

Вилоят экология бошқармаси автомобиль йўли бўйларига экилган манзарали дарахт ва кўчатларни мониторинг қилиб, ҳисоби юритилишини таъминлайди.

Қарши тумани маҳаллаларида ҳам “Яшил макон” умуммиллий лойиҳаси доирасида терак қаламчалари ва кўчат экиш ишлари самарали олиб борилмоқда. Маълумот учун, жорий йилда туманда 30 295 та терак қаламчаси ва 17 905 та терак кўчати экиш режалаштирилган.

Ушбу яшиллаштириш ишларининг яна бир муҳим жиҳат шуки, Наманган вилоятидан келган тажрибали деҳқонлар терак қаламчалари ўтқазиш ва кўчат экиш ишларида яқиндан ёрдам кўрсатишмоқда.

Бундан ташқари, Бош вазир ўринбосари Шуҳрат Ғаниев Қарши туманида 17 минг дона мевали дарахт кўчатларини аҳоли хонадонларига экишда бош-қош бўлмоқда. 30 минг дона кўчат олиб келиниб, аҳоли хонадонларига тарқатила бошланди.

Косон туманида ҳам “Яшил макон” умуммиллий лойиҳаси доирасида кўчат экиш бўйича Фарғона тажрибаси ўрганилди.

Фарғона вилоятидан келган фермерлар кенгаши ва туман масъул раҳбарлари ҳамкорлигида семинар ўтказилиб, унда дарахт экиш борасида янги услублардан фойдаланиш бўйича амалий кўрсатма ва маълумотлар берилди.

Ҳудуднинг чўл зоналари ва чиқинди полигонлари номини олган манзиллар ҳам обод бўлмоқда. Қарши чиқинди полигони вазифасини ўтаган Қўнғиртоғ тепаликларига туташ, бир пайтлар кўзи тушган кишининг дилини хира қиладиган йирик майдонларгача ташаббус етиб борди. У ердаги 20 гектардан ошиқ дала ўзлаштирилиб, воҳа иқлимига мос мевали ва манзарали дарахт кўчатлари экишга тайёрланди ва айни вақтда иш қизғин давом этмоқда.

“Чўл иқлимига мос жийда, наъматак, бодом, ўрик каби доривор мевали, қарағай, қайрағоч, акация каби манзарали иҳота дарахтлари кўчатларини ўтқазяпмиз”, – дейди “Қашқадарё вилояти сув лойиҳа” масъулияти чекланган жамияти раиси Бахтиёр Авазов. – “Уларни суғориш тизимини йўлга қўйиш учун шу ҳудудга энг яқин жойдан ўтган Пистали каналидан сув олиш ва томчилатиб суғориш технологиясини қўллаш мўлжалланяпти”.

Айтиш мумкинки, “Яшил макон” умуммиллий лойиҳаси доирасида яқин уч йил ичида Қашқадарёда умумий майдони 90 гектарга тенг яшил боғлар ҳамда  87 гектарда яшил жамоат парклари барпо этилади.

2022-2024 йилларда вилоятнинг ҳар бир туманида 3 гектардан 15 гектаргача бўлган майдонда яшил боғлар вужудга келади. Уларни барпо этиш учун вилоят бўйича умумий ҳисобда 4,5 миллиард сўмдан ортиқ маблағ, жумладан, кўчат экиш билан боғлиқ харажатларга 3 миллиард 150 миллион сўм, томчилатиб суғориш тизимини жорий этишга эса 1 миллиард 418 миллион сўм сарфланади.

Жорий йилнинг ўзидаёқ вилоятимизда 37,8 гектар яшил боғлар пайдо бўлса, шундан энг катта майдонлар Косон (6 гектар), Қамаши (4,8 гектар), Нишон, Қарши ва Яккабоғ (4 гектардан) туманлари ҳиссасига тўғри келади.

Қашқадарё вилояти ҳокимлиги ахборот хизмати Ⓣ