Эрон билан ядровий келишув бўйича музокаралар қайтадан бошлангани маълум қилинди

Жозеп Боррелнинг сўзларига кўра, боши берк кўчага кириб қолган музокаралар қайтадан бошланган.

Фото: AP

Икки ойлик танаффусдан сўнг Эрон билан ядровий келишув бўйича музокаралар қайтадан бошланди. Бу ҳақда Евроиттифоқнинг ташқи ишлар ва хавфсизлик сиёсати бўйича олий вакили Жозеп Боррел маълум қилди.

Унинг сўзларига кўра, боши берк кўчага кириб қолган музокаралар қайтадан бошланган.

Жорий ҳафта бошида Европа ташқи алоқалар хизмати раҳбари ўринбосари Энрике Мора Теҳронга сафар қилганди. У Венадаги музокараларда ЕИ номидан қатнашади.

Аввалроқ Эрон ташқи ишлар вазирлиги матбуот котиби Саид Хатибзода АҚШ санкциялар натижасида эронликларга етказилган зарарни қоплаб берса, Эрон ядровий келишувни имзолашга тайёрлигини айтганди.

2015 йилда Эрон ва БМТ хавфсизлик кенгаши аъзолари (АҚШ, Россия, Хитой, Буюк Британия ва Франция) ҳамда Германия ўртасида Эрон ядровий дастури бўйича келишув имзоланганди.

АҚШ 2018 йилда келишувдан бир томонлама тартибда чиқиб кетганидан сўнг, Эрон келишув бўйича мажбуриятларини бажаришни тўхтатганди.