Германияда 101 ёшли қария концлагерда соқчилик қилганликда айбланиб беш йилга қамалди

Қария ҳеч қачон концлагерда хизмат қилмаганини айтиб, айбини тан олмади.

Фото: Reuters

Германиянинг Нойруппин шаҳри суди Заксенхаузен концентрацион лагерининг 101 ёшли собиқ соқчисини беш йилга озодликдан маҳрум этиш тўғрисида ҳукм чиқарди.

У лагердаги минглаб маҳбусларнинг ўлимига алоқадорликда айбланди.

Хабар қилинишича, суд жараёни тўққиз ой давом этди. Айбланувчи ҳеч қачон Заксенхаузенда хизмат қилмагани, айблов хулосасида кўрсатилган вақтда эса Мекленбургдаги фермада ишлаганини айтди.

Аммо прокуратура унинг айбини исботловчи тегишли ҳужжатларни тақдим этди.

Заксенхаузендаги концентрацион лагерда Иккинчи жаҳон уруши тугагунига қадар 200 мингдан ортиқ маҳбус сақланган. Ўн минглаб маҳбуслар очлик, касаллик, мажбурий меҳнат, тиббий тажрибалар оқибатида вафот этган.