Самарқандда фуқарони 5 минг доллар эвазига ўқишга киритмоқчи бўлган ОТМ бўлим бошлиғи ушланди

Самарқанд давлат архитектура-қурилиш институти бўлим бошлиғи фуқарони ўқишга киритишини айтиб, эвазига 5 минг доллар олаётганда қўлга олинган.

Фото: Самарқанд вилояти ИИБ Ахборот хизмати

Самарқанд вилояти ИИБ ахборот хизматининг хабар беришича, 2022 йил 1 июль куни фуқаронинг аризасига биноан вилоят ИИБ ЖҚБ ҳамда ДХХ бошқармаси ходимлари ҳамкорлигида тезкор тадбир ўтказилган.

Тадбирда, Самарқанд давлат архитектура-қурилиш институти сиртқи бўлим бошлиғи Х.В. ариза муаллифидан унинг жиянини ўзи ишлайдиган ОТМга ўқишга киритиш эвазига 5 минг доллар олган вақтида ашёвий далиллар билан қўлга олинган.

Қайд этилишича, мазкур ҳолат юзасидан Самарқанд шаҳар бўйича ИИО ФМБ томонидан терговга қадар текшириш ҳаракатлари олиб борилмоқда.