Германия БМТ конференциясида иқлим бўйича реал ҳаракатларни талаб қилди

Петерсберг иқлим мулоқотига мезбон бўлган Германия ва Миср кузда Мисрнинг Шарм ал-Шайх шаҳрида бўлиб ўтадиган БМТнинг иқлим ўзгариши бўйича конференциясида аниқ натижаларга эришишга интилмоқда. Германия ташқи ишлар вазири Анналена Бербок 19 июль, сешанба куни Берлинда мисрлик ҳамкасби Самеҳ Шукри билан ўтказган қўшма матбуот анжуманида шунчаки сўз эмас, амалда иш қилиш зарурлигини айтди: «Биз иқлим инқирозини кейинга қолдира олмаймиз, шунинг учун биз иқлим инқирозига қарши курашишни ҳам кейинга қолдира олмаймиз», - дея таъкидлади у.

Бербок, бошқа инқирозлар муҳимроқ кўринса ҳам, иқлим ўзгариши масаласини унутмаслик кераклигини айтди.

Шу билан бирга, немис вазири иқлим инқирозига қарши курашнинг турли концепцияларига қарши туришдан огоҳлантирди: ҳамма бирлашиши керак, кейинги кечикишлар ва муросага йўл қўйиб бўлмайди, деди Анналена Бербок. 

Самеҳ Шукри, шунингдек, шошилинч чоралар кўриш ва ҳеч бир давлат ортда қолмаслигини таъминлаш муҳимлигини таъкидлади. У, шунингдек, иқлим ўзгаришидан айниқса жабрланган мамлакатларга кўпроқ ёрдам беришга чақирди. 

Петерсберг мулоқоти доирасидаги Берлин йиғилиши Шарм ал-Шайхда бўлиб ўтадиган Бутунжаҳон иқлим конференциясига тайёргарликнинг аниқ масалалари ва атроф-муҳит муҳофазасини кучайтириш чора-тадбирларига бағишланди. Унда 40 га яқин давлат вакиллари иштирок этди. 

Бундай форматдаги биринчи иқлим форуми 2010 йилда ўша вақтдаги канцлер Ангела Меркел ташаббуси билан Бонн яқинидаги Петерберг шаҳрида, бир йил аввал БМТнинг Копенҳагендаги конференциясида иқлим бўйича глобал келишув бўйича музокаралар муваффақиятсизликка учраганидан кейин ўтказилган эди.