Россия Украина Запорижжя АЭСни эгаллаш учун гуруҳ жўнатганини айтди. Тунда станция яна ўққа тутилган

РФ мудофаа вазирлиги 1 сентябр куни украин ҳарбийлари Запорижжя АЭСни эгаллаб олишга уринганини маълум қилди. Вазирлик маълумотига кўра, маҳаллий вақт билан эрталабки соат 6:20 да АЭСдан уч километр шимоли-шарқдаги Кахова сув омбори соҳилига «иккита диверсия гуруҳи» туширилган, жами 60 нафарга яқин киши еттита моторли қайиқларда сузиб келган.

Росгвардия жангчилари ва россиялик ҳарбийлар «диверсантлар» йўлини тўсган, россияликларнинг вертолётлари ҳам жангга қўшилган. Запорижжя областининг россияпараст маъмурияти вакили Владимир Роговнинг маълум қилишича, 60 нафар украин ҳарбийсидан 40 нафарга яқини ҳалок бўлган. У соат 13 лар атрофида ТАСС билан суҳбатда уч нафар украин ҳарбийси асир олингани, яна 12 киши ҳарбий ҳаракатларни давом эттираётганини айтган.

Соат 7 атрофида, РФ мудофаа вазирлигининг тасдиқлашича, Запорижжя АЭСдан бир неча километр масофадаги Водяное қишлоғига Никополдан иккита қўлбола баржада (шатакка олиб юриладиган ёки ўзиюрар юк кемаси) «Украина армиясининг тактик десанти» юборилган. Россиялик ҳарбийларнинг айтишича, десантчиларнинг икки баржаси ҳам чўктириб юборилган.

Украина томони АЭСни эгаллаб олиш бўйича уринишлар ҳақидаги хабарларга муносабат билдирмади.

Тунда Запорижжя АЭС ва Энергодар ўққа тутилди. Энергодарнинг «вақтинчалик маъмурияти» тасдиқлашича, Украина артиллерияси кўп қаватли уйлар ва иккита болалар боғчасига зарба йўллаган, натижада ёнғин юзага келган. Владимир Роговнинг айтишича, тинч аҳоли вакилларидан уч киши ҳалок бўлган, яна беш киши, жумладан бир бола яраланган.

Запорижжя АЭС ҳудудида бўлиб турган Reuters журналисти отишмалар чоғида Энергодарда турар жойлар шикастлангани, одамлар ертўлаларга яширинганини хабар қилган. Унинг сўзларига кўра, ҳужум вақтида атрофларда ҳарбийлар чопиб юрган, вертолётлар ҳавога кўтарилган, лекин ким ўт очганини аниқлаб бўлмаган. Кун ярмига келиб Энергодарда электр таъминоти ва мобил алоқа узилган, россияпараст расмийлар буни Украина қуролли кучларининг зарбалари билан боғлаган.

Украина ва Россия томонлари тунги отишмалардан кейин Запорижжя АЭСнинг икки реакторидан бири ишлашдан тўхтаганини маълум қилган. Украинанинг «Энергоатом»и маълумотига кўра, Россия тунда Запорижжя АЭСни миномётлардан ўққа тутган, шундан кейин авария ҳолатидан ҳимояланган станциянинг 5-энергоблоки ўчган. Ўз навбатида, Владимир Рогов «зарбалар туфайли» ишлаб турган иккита энергоблокдан бири ўчирилганини айтган.

Россия ва Украина бир-бирини Халқаро атом энергетикаси агентлиги миссиясининг ЗАЭС ҳудудига ташрифини барбод қилишга уринишда айблади (1 сентябр куни куннинг иккинчи ярмида агентлик делегацияси станция ҳудудига етиб келди). РФ мудофаа вазирлиги украинлар артиллерияси Запорижжя АЭС ҳудудини, шунингдек делегациянинг Россия вакиллари билан учрашиши кўзда тутилган Васильевкадаги назорат-ўтказиш пунктини ўққа тутганини маълум қилган.

Запорижжя областининг сайланган губернатори Олександр Старух эса эрталабки соат 8 атрофида «россияликлар Халқаро атом энергетикаси агентлиги миссияси Запорижжядан Энергодар ҳудудидаги АЭСга келиш учун олдиндан келишилган маршрут бўйлаб ўт очаётгани»ни айтган. У Россиядан миссияга украинлар ядро объектига кириш учун имкон беришни талаб қилган.

Украина президенти офиси маслаҳатчиси Михаил Подолякнинг айтишича, «Россия бунда Украинани айблаш учун Энергодарга Халқаро атом энергетикаси агентлиги миссияси расмий йўналиши бўйлаб намойишкорона зарбалар берди». Унинг сўзларига кўра, бу «РФнинг агентлик текширувидан қай даражада манфаатор экани»ни кўрсатади.

Ҳудудда ҳарбий ҳаракатлар кечаётгани ҳақидаги хабарларга қарамай Халқаро атом энергетикаси агентлиги бош директори Рафаэл Гросси бошчилигидаги делегация АЭСга йўл олди. Бугун эрталаб миссия фронт чизиғидан 20 километр масофадаги Новоалександровка посёлкасида жойлашган блокпостга етиб келганди. Кейинроқ агентлик вакили делегация Украина назоратидаги ҳудудда уч соат ушланиб қолганини айтди. Рафаэл Гросси тонгда делегация аъзолари йўлга тушишга қарор қилгани, «аммо қайтишга мажбур бўлгани»ни айтганди. Кун ярмида журналистлар билан мулоқот чоғида у миссия ҳарбий қўмондонлик билан музокаралар олиб бораётгани ва яна станция томон йўлга чиқмоқчи бўлаётганини айтганди.

Сўнгги маълумотларга кўра, Халқаро атом энергетикаси агентлиги миссияси АЭС ҳудудига етиб келган ва «Росатом» делегацияси билан учрашган. Бунга қадар миссия бир неча соат мобайнида фронт чизиғидаги блокпостда хавфсизлик хизмати рухсатини кутиб турганди.

Халқаро атом энергетикаси агентлиги миссияси Запорижжя АЭС объектларига етказилган жисмоний зарар кўламини баҳолаш, асосий ва захира хавфсизлик тизимлари ишлаётганини текшириш, ходимларнинг иш шароитларини ўрганиш ҳамда атом электр станциясидаги хавфсизликни таъминлашнинг шошилинч чораларини қабул қилиш учун келган. Агентликдагилар август ойи бошида Запорижжя АЭСда хавфсизлик протоколлари ёппасига бузилаётганини айтишганди.