Путин МДҲ давлатларини чегарадаги вазиятга эътибор қаратишга чақирди

«Бизнинг геосиёсий рақибларимиз ўз мақсадларидан келиб чиқиб, яқинда айтганимиздек, ҳаммани, ҳар кимни, исталган давлатни фош қилишга, уни инқироз ўчоғига айлантиришга, рангли инқилобни қўзғатишга ва қонли қирғинни бошлашга тайёр. Биз буларнинг барчасини бир неча бор кўрганмиз», — деди Путин МДҲ давлатлари разведка хизматлари раҳбарлари билан суҳбат чоғида.

У МДҲ мамлакатлари хавфсизлигига таҳдидларни таҳлил қилишга чақириб, чегаралардаги вазият эътибор талаб қилишини таъкидлади. 

«Шубҳасиз, Афғонистон ҳудудида жойлашган халқаро террорчилар чегарадош давлатлар, жумладан, МДҲ давлатлари билан боғлиқ жиноий режалар тузиши мумкин», — деди Россия раҳбари.

Путиннинг сўзларига кўра, МДҲ мамлакатлари разведка хизматлари мавжуд ва юзага келиши мумкин бўлган таҳдидларга қарши курашиш учун мувофиқлаштирилган ҳолда ҳаракат қилиши ва бир-бирини қўллаб-қувватлаши керак. У турли йўналишларда: ахборот алмашинувидан тортиб, кадрлар тайёрлашгача бўлган ҳамкорликни ривожлантириш мақсадга мувофиқлигини таъкидлади.

Путин, шунингдек, МДҲ давлатларининг савдо айланмаси АҚШ ва унинг иттифоқчилари босимига қарамай ўсиб бораётганини қўшимча қилди.

Россия президенти Владимир Путиннинг МДҲ махсус хизматлари ва разведка ташкилотлари раҳбарлари билан видеомулоқотида Ўзбекистон ДХХ раиси Абдусалом Азизов ҳам иштирок этди.