Ўзбекистон Гайана билан дипломатия муносабатларини ўрнатди

Гайана Ўзбекистон билан дипломатия муносабатларини ўрнатган 142-давлатга айланди, деб хабар бермоқда «Дунё».

10 октябрь куни Нью-Йорк шаҳрида (АҚШ) Ўзбекистон ва Гайана ўртасида дипломатик муносабатлар ўрнатиш тўғрисида қўшма коммюнике имзоланди.

Ҳужжатни икки давлат ҳукумати номидан Ўзбекистоннинг БМТдаги доимий вакили Бахтиёр Иброҳимов ва Гайананинг БМТдаги доимий вакили Каролин Родригез Биркет имзолади.

Гайана давлати Жанубий Америка шимоли-шарқий соҳилида жойлашган, Британия Ҳамдўстлиги, Америка давлатлари ташкилотига аъзо.

Томонлар халқаро ташкилотлар, жумладан, БМТ ва унинг ихтисослашган муассасалари доирасида қўшма ҳамкорликни мустаҳкамлашдан манфаатдор эканини тасдиқлади. Ҳамкорлик йўналишларини излаш учун икки томонлама алоқаларни давом эттириш бўйича келишувга эришилди.

Ҳужжат имзоланиши Ўзбекистоннинг Жанубий Америка давлатлари билан ўзаро ҳамкорлигини кенгайтириш йўлидаги муҳим қадам бўлди, дейилади хабарда.