Футбол бўйича жаҳон чемпионати бошланишига саноқли кунлар қолганда ФИФА собиқ президенти Зепп Блаттер шов-шувли интервью бериб, унда мундиал мезбонлиги Қатарга топширилиши жиддий хато эканини айтиб ўтди. Унинг айтишича, Россияда ўтган ЖЧ-2018дан кейин ЖЧ-2022 АҚШга топширилиши лозим бўлган. Аммо Франция собиқ президенти Николя Саркози коррупцион йўл билан йирик турнирнинг Қатарда ўтишига таъсир қилган.
«Азалий сиёсий рақиблар навбати билан жаҳон чемпионатини ўтказишса, бу тинчликка ишора бўларди»
Блаттер Tages-Anzeiger нашрига интервью бериб, барчасини ошкор қилди: Жаҳон чемпионати Қатарда бўлмаслиги керак эди. Қолаверса, Россиядаги ЖЧ-2018дан кейин сиёсий сабабларга кўра йирик турнирга АҚШ мезбонлик қилиши кутилган.
«Қатардаги мундиал – хатолик. Футбол ва жаҳон чемпионати бу мамлакат учун ҳаддан зиёд катта воқелик. ФИФАнинг ўша пайтдаги президенти сифатида бунинг учун жавобгарлик менинг гарданимда. Бироқ тарихни энди ўзгартириб бўлмайди.
Ўшанда ижроия қўмитасида биз Россия 2018 йилги жаҳон чемпионатини, АҚШ эса 2022 йилги мусобақани қабул қилиши бўйича амалда келишиб бўлгандик. Чунки азалий сиёсий рақиблар навбати билан кетма-кет жаҳон чемпионатини ўтказишса, бу тинчликка ишора бўларди», - дея қайд этган Блаттер.
«Саркози Платинидан Қатарга ёрдам беришни сўради: ўрнига Франциядан 14,6 миллиард долларга қирувчи самолётлар сотиб олинди»
ФИФА собиқ раҳбарининг сўзларига кўра, Франция президенти Николя Саркози УЕФАнинг ўша пайтдаги раҳбари – ҳамюрти Мишель Платинидан Қатарнинг мезбонлик учун аризасини қўллаб-қувватлашни сўраган.
«ФИФАнинг 2010 йилги Конгрессидан бир ҳафта аввал Мишель Платини менга қўнғироқ қилиб, режамиз иш бермаслигини тушунтиришга ўтди. Билишимча, ўшанда Франция президенти Саркози Қатар валиаҳд шаҳзодаси билан тушлик қилиб бўлганидан сўнг, уни Елисей саройига таклиф қилган.
Саркози Платинига: «Жаҳон чемпионати мезбонини аниқлаш пайтида сиз ва УЕФАдаги ҳамкасбларингиз Қатар учун нималар қила олишингиз ҳақида ўйлаб кўринг», - деган.
Платини мендан: «Зепп, президентингиз сиздан ниманидир илтимос қилиб сўраганида, қандай йўл тутардингиз?», деб сўраб қолди. Шунда мен унга бу савол хаёлимга ҳам келмаганини, чунки Швейцарияда президент йўқлигини айтдим.
Охир-оқибат барчаси у истагандек бўлди: Платинининг 4та овози туфайли ЖЧ-2022 мезбонлиги АҚШга эмас, Қатарга топширилди. Албатта, бу ерда пул ҳам муҳим роль ўйнаган. Мезбон аниқ бўлгач, ярим йил ўтмай Қатар Франциядан 14,6 миллиард долларга қирувчи самолётларни сотиб олди», - дейди Блаттер.
