НАТО бош котиби: Путин Украинада узоқ давом этадиган урушни режалаштиряпти

Кремль Украинада узоқ давом этадиган урушга ҳозирлик кўрмоқда, шунинг учун бу мамлакатни қўллаб-қувватлаётган барча НАТО давлатлари Россия президенти Владимир Путин «жанг майдонида ғалаба қозона олмаслигини» тушунмагунча, Киевга қурол етказиб беришда давом этиши керак. Бу ҳақда 16 декабрь, жума куни AFP агентлигига берган интервьюсида альянс бош котиби Йенс Столтенберг маълум қилди. 

Унинг сўзларига кўра, Путин Украина устидан назоратни қўлга киритиш мақсадидан воз кечгани ҳақида ҳозирча ҳеч қандай аломат йўқ. «Россияни паст баҳоламаслик керак. Россия узоқ урушни режалаштирмоқда», - дея огоҳлантирди Столтенберг. «Биз улар кўпроқ кучларни сафарбар қилаётганини, катта йўқотишларга тайёр эканини, кўпроқ қурол ва ўқ-дориларга эга бўлишга ҳаракат қилаётганини кўряпмиз. Президент Путин бу урушда узоқ вақт қолишга ва янги ҳужумларни бошлашга тайёр эканини тушунишимиз керак», дея қўшимча қилди у. 

Шу билан бирга, НАТО бош котиби фикрича, бу уруш «кўп урушлар каби музокаралар столида тугаши» мумкин, аммо якунда ҳар қандай қарор «Украинанинг суверен, мустақил давлат сифатида ғалабасини таъминлаши керак». «Бунга эришишнинг энг тезкор йўли – президент Путин жанг майдонида ғалаба қозона олмаслигини, балки ўтириб, виждонан музокаралар олиб бориши кераклигини тушуниши учун украиналикларга ҳарбий ёрдам кўрсатишдир», - деди Йенс Столтенберг.

Унинг қайд этишича, иттифоқчилар Украинага Patriot зенит-ракета комплексларини (ЗРК) етказиб бериш бўйича музокаралар олиб бормоқда. Бироқ, Столтенбергнинг сўзларига кўра, ҳозирги муҳим масала - аллақачон етказиб берилган қуроллар иш ҳолатида қолиши. Шунинг учун НАТО ўз захираларини тўлдириш учун ҳам, Киевга янги қурол-яроғ етказиб бериш учун ҳам қурол ишлаб чиқаришни оширмоқда, деди у.