Россия Украинага янги йил куни ҳам зарбалар йўллади. Асосий маълумотлар

Украина ҳаво кучлари қўмондонлиги спикери Юрий Игнат украин телемарафони эфирида Россиядан учирилган барча дронлар уриб туширилгани ҳақида айтган.

«Бу жуда жиддий натижа. Осмон ишончли ҳимоя остида эканини кўриб турибмиз», деган у.

«NASAMS ҳарбийларимизнинг ўқларини отишга базўр улгурди. Айтиш мумкинки, ҳеч ким ушбу ҳаво ҳужумидан мудофаа тизимидан фойдаланишда бундай тажрибага эга эмас: жанг вақтида комплексни қайта ўқлаш ва ҳаво нишонларини йўқ қилиш. Бу шуни англатадики, уларнинг сони бизда кам. Ракеталар бор, яна ҳаво ҳужумидан мудофаа тизимлари керак», дея қўшимча қилган Игнат.

Ҳарбийлар маълумотига кўра, 13 та дрон 2022 йилнинг охирги соатларида, 32 таси эса - 2023 йил кириб келганидан кейин уриб туширилган.

Украина президенти офиси раҳбари ўринбосари Кирилл Тимошенконинг маълумотига кўра, дронлар ҳужуми вақтида 50 киши яраланиб, икки киши ҳалок бўлган.

Киев области маъмурияти раҳбари Алексей Кулеба ўз телеграм-каналида Россия дронлари мақсади энергетика инфратузилма объектлари бўлгани ҳақида ёзди.

«Дастлабки маълумотларга кўра, жабрланганлар йўқ. Инфратузилма объектлари шикастланган. Бутун тун бўйи жойларда фавқулодда хизматлар иш олиб борди», - дея ёзади Кулеба.

Киев области миллий полицияси раҳбари Андрей Небитов эълон қилган фотосуратда уриб туширилган дронда рус тилида «Янги йил билан» («С Новым Годом») ёзуви акс этганини кўриш мумкин.

Дастлабки маълумотларга кўра, Киевда қурбонлар ва жабрланганлар бўлмаган.

«Тунда ҳаво ҳужумидан мудофаа тизимларининг заргарона иши янада яққол кўринади. Энди мен биламанки, агар осмонда ёрқин чақнаш бўлса - барчаси жойида, агар пастроқда кичик чақнаш бўлса - фалокат бўлиши мумкин», дея Киевга тунги ҳужумни тасвирлайди маҳаллий аҳоли вакили Виктория Волонтырец. «Ёрқин чақнашлар кўп эди, учқун эса - фақат бир марта бўлди. Мен тунда ўрнимдан ирғиб турдим, чунки жуда баланд овозлар эшитилар ва ҳаммаёқ ёришиб кетганди», дея қўшимча қилади у.

Шу билан бирга, Украинанинг Донецк областининг босиб олинган қисми ҳукумати Украина армияси томонидан берилган зарбалар ҳақида хабар берган. Уларнинг маълумотига кўра, янги йилга ўтар кечаси фронт чизиғидаги Донецк ва Макийивка шаҳарлари реактив ўт очиш тизимлари ва стволли артиллериядан ўққа тутилган.

Ижтимоий тармоқларда Макийивкада сафарбар қилинган ҳарбийлар жойлаштирилган ўқув биноси ер билан битта бўлгани акс этган тасвирлар тарқалган. Хабарларга кўра, 50 нафардан бир неча юз нафаргача россиялик ҳарбий ҳалок бўлган.

Украинага 31 декабр куни давомида берилган зарбалар

Тунда дронлар ҳужуми рўй беришидан бир неча соат олдин Украина пойтахтига ракеталар орқали ёппасига ҳужум уюштирилганди.

Киев мэри Виталий Кличко 31 декабр куни давомида келиб тушган зарбалар оқибатида фуқаролик инфратузилмаси шикастлангани, 20 киши жароҳат олиб, бир киши ҳалок бўлганини айтган. 14 киши, жумладан шаҳар марказидаги меҳмонхоналардан бирида яшаб келган япониялик журналист шифохонага ётқизилган. Ракета келиб тушиши оқибатида бу меҳмонхонанинг бир қисми қулаб тушган.

Киев шаҳар маъмурияти хабар қилишича, шаҳар атрофида ҳаво ҳужумидан мудофаа кучлари ҳаводаги еттита нишонни уриб туширган. Аммо ракета парчалари Киевнинг тўрт райони, жумладан марказий район ҳудудига тушган. Икки мактаб биноси ва Соломенский районидаги болалар боғчаси шикастланган.

Ракета парчалари Святошинский районидаги «Темп» стадионига ҳам тушган. Шунингдек портлаш тўлқини Киевдаги асосий концерт майдонларидан бири, янги йил кунлари болалар учун спектакллар қўйиладиган «Украина саройи» биноси ойналарини тўкиб ташлаган.

Хмельницкий шаҳрида отишмалар чоғида етти киши жабрланган, област раҳбари Сергей Гамалийнинг айтишича, шундан уч киши оғир аҳволда.

Запорижжяда ракета зарбаси оқибатида тўрт киши жабрланган, област маъмурияти раҳбари Олександр Старухнинг сўзларига кўра, бир киши жонлантириш бўлимида қолмоқда.

Украина қуролли кучларига кўра, Россия Украина бўйлаб 20 дан ортиқ ракета учирган, шундан 12 таси уриб туширилган.

31 декабр куни кундузи Россиянинг Волгоград области Линево қишлоғида иккита турар жой биносига «номаълум объектнинг металл парчалари» тушган. Ижтимоий тармоқларда парчаларнинг қулаши ва шундан кейин чиққан ёнғин видеоси тарқалган. Жабрланганлар йўқ.

Украина қуролли кучлари стратегик коммуникациялар бошқармаси хабар қилишича, посёлкага Украина томон учирилган ракета қулаб тушган.

Россия мудофаа вазирлиги 31 декабр кунги зарбалар ҳарбий объектлар томон йўлланганини маълум қилди. «РФ қуролли кучлари 31 декабр куни Украинанинг зарбдор дронлари ишлаб чиқариладиган объектлар бўйлаб юқори аниқликдаги ёпирилма зарбалар йўллади», дейилади вазирлик хабарида. Россия ҳарбийлари ҳужумлар оқибатида украин зарбдор дронларини сақлаш ва учириш жойлари яксон этилганини қўшимча қилишган.

Зеленскийнинг мурожаати

Янги йил кечаси кўплаб украиналиклар Володимир Зеленскийнинг Киевнинг қоронғи кўчасида, президент офиси яқинида ёзиб олинган ва 17 дақиқа давом этган мурожаатини томоша қилишди.

Зеленский йилнинг катта қисмида давом этган урушнинг оғир кунлари ҳақида эслаган.

«Бу йил 24 февралда бошланганди. Муқаддимасиз, кириш қисмисиз. Бирданига. Жуда эрта маҳал. Соат 4 да. Қоронғи эди. Товушлар баланд эди. Кўпларга қийин, кимларгадир - қўрқинчли. 311 кун ўтди. Бизда ҳозир ҳам қоронғи бўлиши мумкин, шовқинли бўлиши мумкин, қийин бўлиши мумкин. Аммо аниғи шуки, қўрқинчли эмас. Ва ҳеч қачон уятли эмас», - дейди Украина президенти.

Президент урушнинг энг оғир паллаларини санаган. «Бизда ҳар бир дақиқа учун айтишга гап бор. Аммо сўзлар кўп бўлиши ортиқча. Улар керак эмас. Изоҳлаш, жимжимали сўзлар териш керак эмас. Сокинлик даркор. Эшитилиши учун. Биз курашяпмиз ва курашишда давом этамиз. Асосий сўз - ғалаба сўзи учун. Бу рўй бериши аниқ. Биз 311 кундирки у томон бормоқдамиз», деган Зеленский.

Эътиборли томони, Зеленский санаган воқеалар қаторида Қрим кўприги ва «Москва» крейсери ҳам тилга олинди. Бу объектларда рўй берган портлашлар Украина томонидан содир этилганига ҳеч кимда шубҳа бўлмаса ҳам, Украина ҳукумати бу ҳолатларга алоқадорлигини расман тан олмаган.

Шанба куни кундузи ҳам Зеленский россияликларнинг Украина ҳудудлари бўйлаб йўллаган зарбаларига жавобан нисбатан кичик видеомурожаат қилганди. Унда у россияликларга ҳам мурожаат этиб, Россияни ўз жиноятлари учун «кечирилмайдиган» «террорчи давлат» деб атади.

«Пасхада улар шундай зарбалар йўллашди, Рождествода ҳам, Янги йилда ҳам. Улар ўзларини христиан деб аташади, ўзларининг православ эканликлари билан фахрланишади, аммо улар - иблислардир. Уни қўлловчи ва у билан бирга бўлувчи», - деган Зеленский.

Рус тилида гапиришга ўтиб, россияликларга мурожаат қилган украинлар президенти ҳозирги уруш - «қандайдир тарихий ва НАТОга қарши уруш» эмаслиги, балки «Россия келажагига ўт қўяётган бир одам охирига қадар ҳокимиятда қолиши учун бўлаётган уруш» эканини айтган.

«Сизнинг етакчингиз унинг орқасида ҳарбийлар турганини, ўзи эса олдинда эканини кўрсатмоқчи бўлмоқда. Лекин аслида у ҳарбийлар, ракеталар, ўз саройларининг деворлари ортига бекинмоқда. У сизнинг ортингизга яширинмоқда. Мамлакатингизни ва келажагингизни ёқмоқда. Бу террор учун ҳеч ким сизни кечирмайди. Украина асло кечирмайди. Ҳа, сизнинг ўзингиз ҳам уни кечирмайсиз», деган Зеленский.

Ҳарбийлар фонидаги Путин

Бундан бироз олдинроқ ижтимоий тармоқда Владимир Путиннинг янги йил мурожаати тарқалганди. Бу мурожаат ҳарбий формадаги одамлар сафи фонида ёзиб олинган. Путин ўз мурожаатида Ғарб мамлакатлари Россияни парчалаш учун Украинадан фойдаланаётганини айтади.

Кремл матбуот котиби Дмитрий Песковнинг сўзларига кўра, Путин мурожаат қилиш учун Жанубий ҳарбий округнинг Ростовдаги штабига борган.

ТАСС нашри қайд этишича, бу йилда Путин энг узоқ вақт давом этган янги йил мурожаатини қилган, у қарийб 10 дақиқа гапирган. Қуйида унинг нутқидан тезислар келтирилади:

• 2022 йилда «Россия жамоатчилигининг бемисл даражадаги жипслашуви» кузатилди;
• Россия «ҳақиқий мустақиллик» учун курашмоқда, ҳозирда асосийси - Россия тақдири.
• «Ғарб тинчлик ҳақида гапириб, дунёни алдаган ва тажовузга тайёрланган. Ғарб сурбетлик билан Украина ва унинг халқидан Россияни парчалаш учун фойдаланмоқда».
• Путин «урушда қурбон бўлган барча ҳарбийларнинг оилалари дардига шерик».