Соледар мудофаасидаги қўмондон ва Херсон атрофидаги артиллериячилар. Уруш суратлари

Украинада урушнинг 320-куни ўтди. Асосий маълумотлар:

Россия қуролли кучлари 5 январдан буён Соледарни «кучли даражада штурм» қилмоқда — бу россияликлар учун муҳим оператив мақсад ҳисобланган Бахмут яқинида жойлашган шаҳардир.
Украина расмийлари Очаков бўйлаб берилган зарбалар оқибатида 100 дан ортиқ уй шикастлангани, 15 киши яраланганини маълум қилди.
Россия президенти ҳузуридаги Инсон ҳуқуқлари кенгаши аъзоси Ева Меркачеванинг хабар қилишича, Украинадаги уруш учун ёлланган маҳбуслар Владимир Путиннинг махфий фармони билан афв этилган — ва бу улар колонияни тарк этиб, ҳарбий ҳаракатлар ҳудудига йўл олишидан олдин рўй берган.
«ДХР» вакиллари Бахмутдан 11 километр масофадаги Бахмутское аҳоли яшаш манзили «озод этилгани» ҳақида хабар берди. Украина томони ҳозирча бу баёнотга муносабат билдирмади.
Самара области раҳбарияти Макийивкадаги база ўққа тутилиши оқибатида яраланганларнинг рўйхатини эълон қилмасликка қарор қилди.

Куннинг асосий воқеаси. Соледар учун жанг

«Вагнер» хусусий ҳарбий компанияси жангчилари Украина армиясининг Соледар шаҳри атрофидаги мудофаа чизиғини ёриб ўтган — Донецк областидаги бу шаҳар Бахмутдан ўн километр масофада жойлашган. «Барчаси буткул вайрон бўлган, шаҳарда ҳаёт аломатлари қолмаган. Ва минглаб одамлар ғойиб бўлган: Соледар атрофидаги ерлар босқинчиларнинг жасадлари ва зарбалардан ҳосил бўлган чандиқлар билан тўлган», — дея вазиятга изоҳ берган Украина президенти Володимир Зеленский.

Вагнерчиларнинг ҳужумлари давом этмоқда: Соледар марказида шиддатли жанглар кетмоқда. Америкадаги Урушларни тадқиқ этиш институти (ISW) ҳар кунги ҳисоботида маълум қилишича, вазият украин кучлари учун «жуда мураккаблашган», жанглар давомида шаҳар Россия ҳарбийлари назоратига ўтиши кутилмоқда. Буюк Британия мудофаа вазирлиги разведкага асосланиб қайд этишича, украин кучлари «чуқур мудофаа чизиқлари барқарорлиги»ни сақлаб қолишмоқда.