Америкаликлар жами 31 та танк беради. Байденнинг сўзларига кўра, етказиб бериш жараёни маълум вақт олади, аммо АҚШ яқин вақтлар ичида украин ҳарбийларини шу танкларни бошқаришга ўргата бошлайди.
«Бу танклар жанг майдонига қадар етиб бориши вақт талаб этади. Биз бу вақтдан украинлар Abrams танкларини ўз мудофаасига интеграция қилишга тўлиқ тайёр бўлишини таъминлаш учун фойдаланамиз.
Биз Украинани қанча керак бўлса шунча қўллаб-қувватлаймиз – бу Россияга қарши кураш эмас, озодлик учун курашдир. Биз озодлик машъаласи имкон қадар ёрқинроқ ёнишини истаймиз», – деган Байден.
АҚШ президенти маъмурияти Украина қуролли кучларига бу танкларга хизмат кўрсатувчи 8 та зирҳли М88 машиналари ҳам юборилишини эълон қилди.
«31 та М1 Abrams танкини жўнатиш ҳақидаги бугунги қарор Украинага ўзини яхшироқ ҳимоя қилишда давом этиши учун зарур бўлган имкониятларни бериш борасидаги саъй-ҳаракатларимизнинг давомидир», деди АҚШ маъмурияти расмийси махсус брифингда. Унинг таъкидлашича, 31 та М1 Abrams танки Украинанинг битта танк батальонига тенг.
ОАВнинг ёзишича, АҚШ Германияни Leopard танкларини беришга кўндириш учун Украинага Abrams танкларини юборишга қарор қилган.
Аввалроқ Bloomberg агентлиги ўз манбасига таянган ҳолда, АҚШ Украина учун M1 Abrams танкларини ишлаб чиқаришга 400 млн доллар маблағ ажратишини хабар қилганди.
Америка нашрлари ёзишича, Украина учун махсус танклар General Dynamics компанияси томонидан ишлаб чиқарилиши туфайли уларнинг етказиб берилиши бир йилгача чўзилиши мумкин.
АҚШ армияси 1980 йилдан буён M1 Abrams танкларига эга. Айни вақтда бундай танкларнинг турлича модификациядаги 2,6 мингдан ортиғидан фойдаланилади, 3,5 мингга яқин танк омборларда сақланади.
Бундай танклар Австралиядан Марокашгача бўлган ўндан ошиқ мамлакатлар армияларида хизмат қилади ва турли шароитларда ўзини яхши томондан кўрсатган.
Аввалроқ америкалик мулозимлар Оқ уй Abrams танкларини Украинага Ғарбнинг Россия билан можароси кескинлашувидан чўчиётгани туфайли эмас, балки америкаликлар танкидан фойдаланиш жуда мураккаблиги ва катта миқдорда махсус ёнилғи талаб этиши билан боғлиқ эканини айтишганди.
