Володимир Зеленский бугун Лондонга боради

Украина президенти Володимир Зеленский 8 февраль куни Лондонга ташриф буюради. Бу ҳақда Буюк Британия ҳукумати маълум қилди.

Фото: president.gov.ua

У Буюк Британияда тайёргарликдан ўтаётган украиналик ҳарбийлар билан учрашиши режалаштирилган, дея хабар берди AP агентлиги Даунинг-стритга таяниб.

Шунингдек, Британия оммавий ахборот воситаларида Володимир Зеленскийнинг Буюк Британия Мудофаа вазирлиги раҳбари Бен Уоллес билан учрашиши ҳақида хабарлар пайдо бўлди.

Президент, шунингдек, Британия мудофаа ва хавфсизлик расмийлари билан учрашиб, украиналик жангчиларни тайёрлаш кенгайтирилган дастури тафсилотларини муҳокама қилади.

Бундан ташқари, бош вазир Риши Сунак Буюк Британиянинг Украинани узоқ масофали қуроллар билан таъминлашга тайёрлигини маълум қилиши мумкин.

Зеленский Британия парламентида ҳам нутқ сўзлаши кутиляпти. Бу ҳақда журналист Патрик Винтур Twitter’да маълум қилди. Унга кўра, Зеленский нутқидан сўнг Лондон Россияга қарши янги санкцияларни эълон қилади.

«Европа кенгаши саммити олдидан Володимир Зеленский Британия парламентига мурожаат қилади, кейин Британия санкцияларни эълон қилади, жумладан, Кремлнинг уруш машинасидан фойда олаётган компанияларга қарши санкциялар назарда тутилган», деб ёзди у.

Шу билан бирга, Даунинг-стрит Украина ҳарбийларини тайёрлаш дастурини кенгайтириш режалари ҳақида маълум қилди.