Тўрт опа-сингил, 7 яшар бола, 17 ёшли ўсмир – зилзиланинг 7-кунида қутқарилганлар

152 соатдан сўнг...

Туркиянинг жануби-шарқидаги Адияман шаҳрида опа-сингиллар – Робия ва Элиф Қирмизилар зилзиладан 152 соат ўтиб қутқарилди. Вайроналар остидан 22 яшар Робиянинг овозини эшитиб қолган қутқарувчилар 8 соат давом этган қутқарув ишларидан сўнг уни юқорига чиқариб олишга муваффақ бўлишади.

Робия шифохонага жўнатилганидан ярим соат ўтгач унинг 28 яшар опаси Элиф қутқарилади.

159 соатдан сўнг...

Қутқарувчилар Ғозиантеп шаҳрининг Нурдағи туманида зилзила натижасида ер билан яксон бўлган кўп қаватли турар жой мажмуаси вайроналари орасидан инсон овозини эшитиб қолишади. Узоқ давом этган қутқарув жараёнидан сўнг 17 яшар Саодат Жўшқин қутқариб олинди.

Вайроналар орасидан замбилда олиб чиқилган Жўшқин тез ёрдам машинасида шифохонага етказилган.

160 соатдан сўнг...

Туркиянинг жанубида жойлашган Ҳатай вилоятининг маъмурий маркази Антакя шаҳрида вайроналар остида қолиб кетган аёл тирик ҳолда қутқарилди.

Антакянинг Жаброил маҳалласидаги кўп қаватли уйда яшаган аёлнинг ёши ва шахси тўғрисидаги маълумотлар мавжуд эмас. Биринчи ёрдам кўрсатиш учун у тиббиёт ходимларига топширилган ва шошилинч шифохонага олиб кетилган.

160 соатдан сўнг...

Ҳатайдаги Ўзкан турар жой мажмуаси вайроналари орасидан бирданига икки киши – 62 яшар Самет Генсо ҳамда 60 яшар Севал Генсо қутқарилди.

Эътиборлиси, ушбу икки шахс жон сақлаб турган жой ўзбекистонлик қутқарувчиларга тегишли хизмат ити томонидан аниқланган. Қутқарув операцияси Ўзбекистон, Мексика ва Туркия қутқарувчилари томонидан амалга оширилган.

161 соатдан сўнг...

Ҳатайнинг Антакя шаҳридаги вайроналар орасидан 18 яшар Рамзия Ойдин ва унинг 7 яшар синглиси Берай қутқарилди.

162 соатдан сўнг...

Зилзиладан кейинги еттинчи кунда 45 ёшли Чингиз Пўлат қутқарилди. У 5 қаватли уйнинг биринчи қаватида рафиқаси ва уч нафар ўғли билан бирга яшаб келган. Қулаган бино қолдиқлари орасида тирик қолган Чингизнинг овозини қутқарувчилар эшитиб қолган.

5 соат давом этган қутқарув операциясидан сўнг эркак қутқарилиб шифохонага етказилди. Қутқарувчилар эса унинг вайроналар орасида қолиб кетган оила аъзоларини вайроналар орасидан олиб чиқиш ҳаракатида. Турк матбуотида уларнинг ҳалок бўлган бўлиши мумкинлиги ҳақида ҳам хабарлар тарқалган.

163 соатдан сўнг...

Ҳатайдаги вайроналар орасидан 7 яшар Мустафо зилзиладан 163 соат ўтиб тирик ҳолда топилди. Олқишлар остида қутқарилган болакай тиббиёт ходимларига топширилган.

166 соатдан сўнг...

Адияманда вайроналар остида қолиб кетган 60 яшар Эрингул Ўндер зилзиладан 166 соат ўтиб тирик ҳолда топилди. Маниса шаҳри ҳокимлиги ёнғин хавфсизлиги бошқармаси қутқарув-қидирув гуруҳи унинг тириклигини вайроналарни сканер қилиш орқали аниқлагани айтилмоқда.

Инсон танасидан чиқадиган ҳароратни аниқлайдиган қурилма вайроналар остида тирик жон борлигини тасдиқлагач, бир неча соат давом этган қутқарув операциясидан сўнг аёл юқорига олиб чиқилди. Бир ҳафта давомида вайроналар орасида қолиб кетган ва бунинг оқибатида буткул ҳолдан тойган Эрингул Ўндер шифохонага олиб кетилган.

Umutların tükendiği anda Adıyaman ilimize bağlı Besni ilçesinden yüreğimizdeki ateşi bir nebze de olsun söndüren mucize bir haber aldık. İtfaiye ekiplerimizin olağanüstü çabasıyla depremin 166. saatinde Üzümlü Kent sitesinde Erengül Önder teyzemizi sağ salim kurtardık. pic.twitter.com/FZion6jt1i

— Cengiz ERGÜN (@cengizergun) February 12, 2023

167 соатдан сўнг...

Антакя шаҳрида зилзиладан 167 соат (бир соати кам 7 сутка) ўтиб бир эркак қутқарилди. Аҳамиятлиси, бу ҳудуддан тирик жон топилишига кўзи етмаган қутқарувчилар бошқа бино харобалари томон кетмоқчи бўлганда ниҳоятда баланд овозда миёвлаган мушук уларнинг диққатини ўзига қаратган. Кейинчалик мушукнинг эгаси вайроналар орасида ётгани маълум бўлди.

Матбуотда исми келтирилмаётган эркак орадан шунча кун ўтган бўлса-да тетик экани билан кўпчиликни ҳайратга солган. У ташқарига олиб чиқилгач замбилдан тушиб қутқарувчиларни бағрига босиб раҳмат айтган. Қутқарувчилар айни пайтда эркакнинг оила аъзоларининг ҳаётини сақлаш қолиш ҳаракатида.

Anadolu ахборот агентлиги хабарига кўра, зилзиладан кейинги 141–163-соатлар орасида камида 41 киши тирик ҳолда қутқарилган.