Қозоғистонда янги туғилган болаларга жамғарма ҳисобварақлари очилади

Қозоғистон Молия вазирлиги мамлакатда 2024 йилдан бошлаб ишга туширилиши режалаштирилган Болалар миллий жамғармаси лойиҳаси тафсилотларини тақдим этди. Бу ҳақда Tengrinews.kz хабар бермоқда.

Молия вазири ўринбосари Даурен Темирбековнинг сўзларига кўра, Миллий банк инвестиция даромадининг 50 фоизини Миллий жамғарманинг ўтган йиллардаги ўртача рентабеллигини инобатга олган ҳолда ҳисоблаб чиқади. Инвестицион даромад ставкасини ҳисобот даврига қадар олдинги 18 йил учун ўртача йиллик қиймат даражасида аниқлаш таклиф этилмоқда. Бунда ҳар битта боланинг жамғармасидаги тахминий пул миқдори 3500 АҚШ долларини ташкил қилиши мумкин.

Банк ҳисоби бола туғилгандаёқ Адлия вазирлигининг маълумотлар базасидан фойдаланилиб, автоматик равишда очилади ва ҳар йили табиий ресурсларни қазиб олишдан олинган маблағлар ҳисобидан тўлдирилиб борилади. Ҳисобни тўлдириш ҳар йили 1 январда, бола 18 ёшга тўлгунга қадар амалга оширилади.

Мазкур маблағлар 18 ёшга тўлгандан кейин уй-жой сотиб олиш ва таълим учун ишлатилиши мумкин. Бундай ҳисобварақларни солиқдан озод қилиш режалаштирилмоқда.

«18 ёшга тўлганидан сўнг маблағлар боланинг мулки бўлади ва ундан қандай фойдаланишни мустақил ҳал қилади. Таълим ёки уй-жой сотиб олиш учун ишлатиш мумкин. Шу билан бирга, хорижий таълим муассасасида ўқиш ҳақини тўлаш учун маблағлардан фойдаланишга чекловлар ўрнатиш режалаштирилмаган. Ўз навбатида, уй-жой сотиб олиш учун йиғилган маблағлардан фойдаланишга фақат Қозоғистонда рухсат берилади. Ушбу маблағларга сотиб олинган уй-жойларни қайта сотиш бўйича чекловлар киритилмайди», — дея қўшимча қилган Даурен Темирбеков.

Шунингдек, лойиҳада қуйидагилар назарда тутилган:

• агар 18 ёшгача бўлган бола мамлакатни тарк этса ва фуқаролигини ўзгартирса, у ҳолда тўловларни талаб қилиш ҳуқуқи йўқолади. Маблағлар қолган болалар ўртасида қайта тақсимланади;
• агар 18 ёшгача бўлган бола фуқаролигини ўзгартирмасдан мамлакатни тарк этса, тўловларни талаб қилиш ҳуқуқи сақланиб қолади;
• 18 ёшга тўлган боланинг ҳисобидаги маблағлар 5−10 йил давомида сақланади;
• агар маблағлар 5−10 йил ичида талаб қилинмаса, ҳисобварақдаги маблағлар пенсия ҳисобварағига ўтказилади;
• тўпланган маблағларни фуқаролик қонунчилигига мувофиқ мерос қилиб, ўтказиш имконияти мавжуд бўлади;
• бола муомалага лаёқатсиз бўлган тақдирда, ота-онаси ёки васийларга қонун ҳужжатларида белгиланган тартибда маблағлардан фойдаланиш ҳуқуқи берилади.