Сингил акасига донорлик қилди.
Хоразм вилояти Қўшкўпир туманида Республика ихтисослаштирилган хирургия илмий-амалий тиббиёт маркази мутахассислари бошчилигида илк бор буйрак трансплантацияси амалиёти ўтказилди. Бу ҳақда ССВ матбуот хизмати хабар бермоқда.
Бемор Зафар Хаитбоевга сурункали гломерулонефритнинг аралаш тури, сурункали буйрак етишмовчилиги терминал босқичи ташхиси қўйилган. Ўтган йилдан бери гемодиализ муолажаларини олган.
Зафар Хаитбоев Тошкент шаҳрига бориб, мураккаб операция орқали соғаймоқчи бўлган. Пойтахтдаги Хирургия маркази жарроҳларининг ўзи Қўшкўпирга келиб, трансплантация амалиётини ўтказган.
Беморга синглиси бир буйрагини берган. Юқори технологик муолажа муваффақиятли ўтган. Ҳозир Зафарнинг ҳам, донорнинг ҳам аҳволи яхши, шифокорлар назорати остида саломатлиги тикланмоқда.
