Президентнинг 2022 йил апрел ойидаги қарорига асосан, Халқ банки Марказий банк билан биргаликда 2022 йилнинг 1 октябрига қадар хориждан 1 800 та банкомат олиб келиши керак эди. Бу банкоматлар ҳудудлар, шу жумладан, олис туманларда ўрнатилиши режа қилинганди.
Kun.uz Uzcard ва Humo интеграциясига оид қарор қабул қилиниб, бу чора банкоматлар жойлашган нуқталарни кўпайтиришга ёрдам бериши айтилганидан кейин, олдин қабул қилинган қарор ижроси аввал қандай бўлгани билан қизиқди.
Халқ банки матбуот хизматининг бизга маълум қилишича, 2022 йил 29 мартдаги 20220207-сонли шартномага асосан Халқ банки томонидан Марказий банк билан ҳамкорликда “SPECTRUM Security Safety Kft” ташкилоти орқали Венгриядан бозор нархида 1 800 дона банкомат олиб келинган ва ҳудудларга тўлиқ ўрнатилган.
