Наманганда вояга етмаган қизнинг номусига теккан шахс қидирилмоқда. ИИВ уни топишда жамоатчиликдан ёрдам сўради

Ижтимоий тармоқларда Намангандаги уйлардан бири махсус кийимдаги ходимлар томонидан ўраб олингани, ҳовлида ҳам фуқаро кийимидаги ходимлар юргани ва аёл кишининг жазавага тушганча уларга қараб бақираётгани акс этган видео тарқалди.

ИИВ ахборот хизматининг билдиришича, тасвирда Наманган шаҳри Ўзбекистон кўчасидаги хонадон акс этган бўлиб, бу ерда яшовчи, 1989 йилда туғилган Шерзод Умаров 1 апрель куни соат 23:30ларда Наманган шаҳрининг Бобур боғидан вояга етмаган қизга ўзини таксичи сифатида таништириб, уйига олиб бориб қўйишини айтган. У машинасига ўтиргандан сўнг эса номаълум манзилдаги уйга олиб бориб, зўрлик ишлатиб номусига теккан.

“Ш.Умаровнинг жиноятга оид ҳаракатлари Бобур боғи ва атроф кўчалардаги кузатув камераларида акс этган. Шунингдек, ҳозирда жабрланувчининг кийимлари, баданидаги тан жароҳатлари ва зўрлик аломатлари юзасидан тегишли судга оид тиббий экспертизалар тайинланган.

Ҳолат юзасидан Ўзбекистон Республикаси ЖКнинг 118-моддаси (Номусга тегиш) 1-қисми билан жиноят иши қўзғатилган.

Жиноят содир этишда гумонланган Ш.Умаровни қўлга олиш махсус тадбири жараёнида оила аъзолари томонидан ходимларга фаол қаршилик кўрсатилиши оқибатида гумонланувчи яширинишга муваффақ бўлган”, дейилади расмий баёнотда.

Шерзод Умаров, бундан ташқари, 27 март куни соат 12:30 ларда Наманган шаҳар Ёшлар мажмуаси ёнидаги чорраҳада велосипедда харакатланиб кетаётган вақтида йўлини тўсганини важ қилган ҳолда «ВАЗ-2106» русумли автомашинасида ҳаракатланиб кетаётган икки ёш йигитни дўппослаб, воқеа жойидан яширинган. Суд-тиббиёт экспертизасининг хулосасига кўра фуқароларга ўртача ва енгил тан жароҳати етказилган.

Мазкур ҳолат юзасидан ҳам гумонланувчига нисбатан Жиноят кодексининг 277-моддаси (Безорилик) 3-қисми «г» банди билан жиноят иши қўзғатилган.

ИИВ Умаров Шерзод Ҳусниддинович «Эпилепсия касаллиги билан боғлиқ шахсиятнинг чуқур бузилиши, бирламчи генерализациялашган талваса хуружлари» ташхиси билан Наманган вилоят руҳий-асаб касалликлари шифохонаси 3-мажбурий даволаш бўлимида назоратда туради.

У муқаддам:

• ЖКнинг 277-моддаси (Безорилик) 3-қисми «а» банди билан (28.12.2006 йилда);
• ЖКнинг 169-моддаси (Ўғрилик) 3-қисми «а» банди билан (23.05.2007 йилда);
• ЖКнинг 165-моддаси (Товламачилик) 2-қисми «в» банди, 227-моддаси 2-қисми «а» банди билан (10.09.2008 йилда);
• ЖКнинг 118-моддаси (Номусга тегиш) 2-қисми «в, г» банди ҳамда 3-қисми «а» банди, 119-моддаси (Жинсий эҳтиёжни зўрлик ишлатиб ғайритабиий усулда қондириш) 2-қисми «в, г» банди, 164-моддаси (Босқинчилик) 3-қисми «а,в»банди, 166-моддаси (Талончилик) 2-қисми «в» банди, 138-моддаси (Зўрлик ишлатиб ғайриқонуний равишда озодликдан маҳрум қилиш) 2-қисми «а» банди, 277-моддаси (Безорилик) 2-қисми «в, б» банди, 127-моддаси (Вояга етмаган шахсни ғайриижтимоий хатти-ҳаракатларга жалб қилиш) 2-қисми «а» банди билан (04.05.2013 йилда),
• ЖКнинг 104-моддаси (Қасддан баданга оғир шикаст етказиш) 2-қисми «в, е, л» бандлари билан (24.04.2021 йилда) судланган.

Вазирлик қидирувга берилган эркакнинг суратини ҳам эълон қилиб жамоатчиликдан уни топишда ёрдам беришни сўраган. Ўз навбатида гумонланувчи руҳий хасталиги ҳамда ниҳоятда тажовузкор эканлигини таъкидлаб, уни учратган шахсларга эҳтиёт бўлиш зарурлигини эслатган.