ЕИ Россиянинг Украинадаги ҳаракатларини экоцид билан тенглаштирди

Россия Украинага экологик зарар етказгани учун жавоб бериши керак, дея маълум қилди Европа Иттифоқи маслаҳат органи. Бунинг учун у Европа Иттифоқини экоцидни жиноий ҳуқуқбузарлик сифатида тан олишга чақирди.

Фото: abc

Европа ижтимоий-иқтисодий қўмитаси (EESC) Россиянинг ҳаракатларини Европа Иттифоқи қонунчилигига мувофиқ жиноий жавобгарликка тортишга чақирди. 5 май, жума куни эълон қилинган баёнотида у Россиянинг Украинадаги уруши оқибатида трансчегаравий атроф-муҳитга етказилаётган зарардан хавотирлар кучаяётганини таъкидлади.

Қўмита Европа Парламенти билан биргаликда экоцидни Европа Иттифоқи даражасида жиноий ҳуқуқбузарлик сифатида қонунчилик томонидан тан олинишини талаб қилди. Бу Россияни Украинадаги ҳаракатлари учун жавобгарликка тортишга ёрдам беради ва “келажакда шунга ўхшаш экологик офатлар такрорланишининг олдини олади”, дейди қўмита аъзолари.

Уруш Украина экотизимига жиддий зарар етказмоқда, дея таъкидлайди EESC ўрмон майдонларининг вайрон бўлиши, сув ва ҳавонинг ифлосланиши ҳақидаги хабарларга таяниб. Украинада Европа биологик турларининг 35 фоизи яшайди, аммо “уруш унинг бой табиий меросига таҳдид солиб, атроф-муҳитга, экотизимларга ва инсон саломатлигига зарар етказди". Хусусан, экин ва яйлов ерларининг ифлосланиши қишлоқ хўжалиги ва жаҳон озиқ-овқат хавфсизлигига бевосита таҳдид солмоқда.

Қўмита Европа Иттифоқини атроф-муҳитни қонуний ҳимоя қилиш, айбдорларни жавобгарликка тортиш ва Украинадаги урушдан кейинги экологик ва ижтимоий тикланиш учун пойдевор қўйиш мақсадида ушбу зарарни ҳужжатлаштириш ва ўлчашга чақиради. "Украинада давом этаётган можаро экотизимимизнинг заифлигини таъкидлаган ҳолда, табиий меросимизни ҳимоя қилиш ва фуқароларнинг саломатлиги ва фаровонлигини ҳимоя қилиш ҳар қачонгидан ҳам муҳимроқдир", дейилади EESC баёнотида.