Украина бўйлаб зарбалар ва Қримда издан чиқиб кетган поезд. Уруш суратлари

Украинада урушнинг 449-куни ўтди. Асосий маълумотлар:

• Россия қўшини 18 майга ўтар кечаси Украинанинг бир қанча областларини, жумладан, Киев ва Одессани ўққа тутди. Украина қуролли кучлари 30 ракетадан 29 таси уриб туширилганини маълум қилди. Пойтахтда жабрланганлар йўқ, Одессада тинч аҳоли вакилларидан бир киши ҳалок бўлган, яна бир киши — Харкив яқинидаги посёлкага ҳужум қурбонига айланган.
• Пентагоннинг хабар қилишича, Киевда 16 май куни ракета зарбасидан шикастланган Patriot ҳаво ҳужумидан мудофаа тизимини тузатишга муваффақ бўлинган ва у ҳозирда тўлиқ ишчи ҳолатида.
• Аннексия қилинган Қримда ғалла ортилган поезд релсдан чиқиб кетди. ОАВ портлаш ҳақида хабар берган. Қрим темирйўллари хабарига кўра, ҳодиса «ташқи аралашув натижасида» рўй берган. Ҳодиса теракт сифатида баҳоланиб, жиноят иши қўзғатилган.
• Россиянинг Белгород области губернатори Вячеслав Гладков хабар беришича, чегарадаги ҳудудлар ўққа тутилиши оқибатида тинч аҳоли вакилларидан икки киши ҳалок бўлган. У ҳужумда Украина қуролли кучларини айблаган, Украина томони бу маълумот юзасидан изоҳ бермаган.

Украина шаҳарлари бўйлаб зарбалар

18 майга ўтар кечаси Россия қўшини Киев, Херсон, Винница, Хмелницкая, Одесса, Харкив ва Житомир областлари бўйлаб навбатдаги зарбалар сериясини амалга оширди. Одессада тинч аҳоли вакилларидан бири ҳалок бўлиб, икки киши яраланган. Харкив областида ҳам бир киши ҳужум қурбони бўлган. Киевда уриб туширилган ракета парчалари тушиши оқибатида гаражлар кооперативида ёнғин чиққан, Херсонда хусусий турар жой биносига зарба келиб тушган.

РФ мудофаа вазирлиги Россия қўшинлари тунда «хорижда ишлаб чиқарилган қуроллар ва техникаларнинг йирик омборлари бўйлаб, шунингдек душманнинг захираларига юқори аниқликда ҳаракатланувчи қуроллар билан гуруҳли зарбалар бергани»ни маълум қилди. Вазирликка кўра, «зарбалардан мақсадга эришилган».

Қуйида ҳужумга учраган шаҳарларда зарба оқибатлари акс этган суратлар.

Бахмутдаги Украина қуролли кучлари жангчилари

Оккупация остидаги Қримда диверсия