FT: Франция Японияда НАТО ваколатхонаси очилишига қарши чиқяпти

Франция Японияда НАТО ваколатхонасини очиш ғоясини қўллаб-қувватламади, дея хабар беради FT. Унинг манбаларига кўра, Франция Хитой билан кераксиз кескинликни яратмоқчи эмас. Аввалроқ Макрон НАТО доираси ва унинг географиясини кенгайтиришга уринишлар катта хато бўлишини айтган эди.

Фото: FT

Франция президенти Эммануэл Макрон НАТОнинг Токиода офис очиш ҳақидаги таклифига эътироз билдирди, деб ёзади Financial Times. Бу офис Ҳинд-Тинч океани минтақасидаги альянс учун биринчи бўлиши мумкин, аммо Франциянинг позицияси НАТО доирасида бир неча ой давом этаётган муҳокамаларни мураккаблаштирди, дейди газетага вазият билан таниш саккиз киши.

АҚШ ва Япония Европани Осиё хавфсизлиги масалаларида, айниқса Хитойнинг Тайван билан юзага келиши мумкин бўлган можаросидан хавотирлар фонида, кўпроқ иштирок этишга чақирмоқда, деб ёзади FT. FT француз манбаларидан бири НАТО низомига кўра, альянс ўз географиясини «Шимолий Атлантика» билан чеклашни талаб қилишини билдирди. Манбанинг таъкидлашича, НАТОнинг Токиодаги ваколатхонаси пайдо бўлиши Украинадаги можаро, хусусан, ЕИнинг Россияга қурол етказиб бермаслик ҳақидаги сўровлари нуқтайи назаридан Хитойнинг Европага ишончига путур етказиши мумкин, деб ёзади газета. Мунозарадан хабардор яна бир манбанинг айтишича, Франция «НАТО ва Хитой ўртасида кескинликни кучайтирадиган» ҳар қандай таклифни қўллаб-қувватламоқчи эмас.

Макрон ўтган ҳафта НАТО Шимолий Атлантикадан ташқарига кенгаймаслиги кераклигини айтди: «Агар биз НАТОни спектр ва географияни кенгайтиришга ундасак, катта хатога йўл қўямиз», деди Франция президенти FT’га.

НАТОнинг янги офисини яратиш учун бутун Шимолий Атлантика кенгашининг (НАТОнинг асосий қарор қабул қилувчи органи) бир овоздан қўллаб-қувватлаши талаб қилинади ва Франция қарор қабул қилинишининг олдини олиш имкониятига эга, деб ёзади Financial Times. НАТО «давом этаётган мунозаралар» тафсилотларига изоҳ беришдан бош тортди. Япония ҳукумати FT’га изоҳ бермади. Газетага Япониядаги манбанинг айтишича, Токио НАТО билан алоқаларни мустаҳкамлашни хоҳлайди. Оқ уй ҳам FT сўровига жавоб бермади. НАТОнинг бутун дунёда, жумладан, Украина ва Молдовада ўнлаб ваколатхоналари ва делегациялари бор, бироқ уларнинг аксарияти кичик бўлиб, маҳаллий ҳукуматлар ва ҳарбийлар билан алоқаларни осонлаштириш учун мўлжалланган, дея таъкидлади FT.