Россиянинг Беларусдаги ядро қуроли: НАТО қурол яқинда жойлаштирилишини билдирди

НАТО Россиянинг Беларусда ядро арсеналини жойлаштириш режалари ҳақидаги баёнотини жиддий қабул қилади, деди НАТО бош котиби Йенс Столтенберг 16 июн, жума куни Брюсселда бўлиб ўтган матбуот анжуманида. "Биз маълум тайёргарликларни кўрдик", деди у разведка маълумотлари ҳақида батафсил гапиришдан бош тортди.

Шимолий Атлантика алянси Россиянинг ҳаракатларини диққат билан кузатиб боради, деди у. “Биз ҳушёр бўламиз ва керакли чораларни кўрамиз”, - деди Столтенберг ва бу мавзу 16 июн куни НАТО ядровий режалаштириш гуруҳи йиғилишида муҳокама қилинганини қўшимча қилди. Шу билан бирга, НАТО бош котибининг таъкидлашича, НАТО ҳозиргача Россиянинг ядровий позициясида ҳеч қандай ўзгаришлар кузатмаган.

“Бу биз бир қанча вақтдан бери кузатаётган ядровий риториканинг бир қисми, - деб эслатди у. - Биз бир неча йиллардан бери Россиянинг НАТО чегаралари яқинида – Узоқ Шимолда ядро қуролини модернизация қилаётгани ва жойлаштираётганини кузатмоқдамиз, энди эса - Беларусда". Столтенберг НАТО кўп йиллар давомида ушбу воқеликка мослашиб, ўз қўшинларининг тайёргарлигини ошириб, шарқий қанотдаги мавжудлигини кенгайтириб, кузатувни такомиллаштириб бораётганини тушунтирди: “Буларнинг барчаси Россия ҳарбий қудратини тизимли равишда оширишга жавобдир”.

16 июн, жума куни Россия президенти Владимир Путин Беларусга биринчи ядровий зарядлар етказилганини эълон қилиб, 2023 йил охиригача Россия тактик ядро арсеналининг бир қисмини қўшни давлат ҳудудига ўтказиш мақсадини билдирди. У бу ҳаракатни “бизни стратегик мағлубиятга учратишни ўйлайдиган ҳар қандай одамга” қарши “тўхтатувчи элемент”, деб атади.