ХВЖ Украинага 890 млн доллар миқдоридаги янги траншни тасдиқлади

Халқаро валюта жамғармаси Украинага кенгайтирилган молиялаштириш дастури доирасида 890 миллион долларлик молиявий ёрдамнинг иккинчи қисмини ажратади.

Фото: AFP

Украина Халқаро валюта жамғармасининг (ХВЖ) кенгайтирилган молиялаштириш дастури доирасида дарҳол тахминан 890 миллион доллар (818 миллион евро) олиши мумкин. Бу ҳақда 29 июнь, пайшанба куни жамғарма сайтида айтилган.

«ХВЖ Ижроия кенгаши бугун Украина учун кенгайтирилган молиялаштириш дастурини (EFF) дастлабки тарзда кўриб чиқишни якунлади. Кўриб чиқиш натижалари ҳукуматга зудлик билан бюджетни қўллаб-қувватлашга йўналтириладиган 890 миллион доллар миқдорида маблағ олиш имконини беради», - дейилади ХВЖ баёнотида.

Жамғарманинг қайд этишича, Украина расмийлари «қийин шароитларда» ислоҳотлар бўйича мажбуриятларни бажаришда «катта муваффақиятга эришган». «Украина иқтисодиёти аста-секин тикланмоқда, бироқ хавфлар ниҳоятда юқори ва ноаниқлик бор. 2022 йилдаги кескин пасайишдан кейин иқтисодий фаоллик кутилганидан кўра барқарорроқ бўлиб кўринди, ўсиш 2023 йилда ички миқёсда 1-3 фоизга кўтарилади. Инфляция секинлашмоқда, захиралар кўпаймоқда, валюта бозори барқарорлигича қолмоқда», — дейилади ХВЖ баёнотида.

Шу билан бирга, жамғарма жанг майдонидаги вазиятнинг ривожланиши Украина учун асосий хавф омили бўлиб қолиши ҳақида огоҳлантирди.

Жорий йилнинг март ойида ХВЖ Украина учун жами 115 миллиард долларлик ёрдам пакетининг бир қисми бўлган 15,6 миллиард долларлик тўрт йиллик молиялаштириш пакетини тасдиқлади. Биринчи транш 2,7 миллиард долларни ташкил этди. Бу Украина учун энг катта кредит бўлди ва ХВЖ томонидан ҳарбий ҳаракатлар олиб борилаётган мамлакат учун биринчи марта тасдиқланган.